港珠澳大撥款唔投票 田大少抽水網民圍插

港珠澳大橋接近54億元追加撥款終於落幕，財委會主席陳健波勇字當頭「剪布」通過撥款，惹來泛民批評，相信佢都預咗，但建制派就覺得佢做得啱，再咁拖落去，咁多工程撥款及其他涉及民生的開支排晒大隊，分分拖死香港經濟發展。

一向同建制派若即若離的田大少，在表決後又喺facebook「抽水」。事緣會議當日，田少問過運輸及房屋局副局長邱誠武，大橋通車後可唔可以開車到珠海，但邱誠武就話應該先集中傾工程，通關同車輛限制的事遲啲再傾。

田少有啲「勞氣」，喺facebook留言話「究竟係邊個求邊個？局長依家教我問問題？不如坦坦白白答好過啦。」佢認為邱誠武只係識得「遊花園」咁喎！

不過今次田少抽水就未得到網友like，反而引嚟唔少人狙擊，因為田少當日會議並無投票，網友質疑田少點解唔投票。田少見辣著火頭，就解話說「所以我冇投票支持政府啦！」不過網友就似乎唔收貨，皆因田少黨友、即係自由黨主席鍾國斌當日投票支持撥款，有網民仲話「冇投支持好叻呀？！ 反對就投反對啦，做議員最唔負責任是不投票！」「你又唔投，抽乜野水姐你，慳d la」。

睇嚟田大少呢次抽水就係唔太成功喎，有時想兩邊討好，好高難度，搞到自己豬八戒照鏡，兩面不是人。

Ariel

** 博客文章文責自負,不代表本公司立場 **

港大校委會主席李國章上周三開記者會炮轟學生被人落毒，矛頭直指公民黨主席余若薇，原來是親戚，親戚打大交，引發網民熱議。

有網民在facebook「CUHK Secrets」專頁貼出李家關係圖，指李國章表弟、腦科權威醫生胡健維，就係余若薇老公；李國章叫余若薇做表弟婦，余若薇可以跟老公叫李國章做表哥。

港大校友關注組等月初遊行，反對任命李國章做港大校委會主席時，胡健維與老婆余若薇一齊參加，可見呢對表兄弟，關係好極有限啦。