運房局局長張炳良周六早上話研究緊租務管制，張局長昨晚澄清政府現時無意研究恢復租管，而是研究實施租金管制對社會的影響。你睇唔睇得明兩者的分別?佢就係話而家政府唔係要實施租管，只係要研究吓啫。
唔好介意我咁講，政府研究得嚟都蚊瞓，研究完萬一真係實施租管時，個樓市都冧咗啦。有辦你睇，三、四年前樓市開始升時，有人建議居屋免補地價就俾業主賣樓，以大量增加可供出售的二手居屋，當時樓價還未急升，馬上做到本來係好事，但政府研究到去年才實行，即係所謂「白居二」政策， 到實行時樓價已大升，結果反應比較差，鬼咩，研究得來已過晒時啦。
政府雖然唔認對租管改口風，其實係改咗，皆因政府有一個長遠房屋策略督導委員會，最近做咗個對房屋政策的諮詢，其中一條問題問到租管，結果竟然有七成意見都係贊成，當中好多住劏房的低下層，見到自己住緊間劏房加租加到飛起，呎租貴過豪宅，所以齊齊俾意見長策會，叫政府恢復租管。聞說長策會中人本來大多反對租管，但那份諮詢報告將在本周公布，外界實見到報告內有大量意見支持租管，所以政府打定開口牌補鑊，話「研究研究」。
樓價上升租金上升，本來唔可以怪晒政府，但政府做嘢做得不夠時，實燒上政府身上。如今兩類租金上升最令小市民反感，第一是劏房這類低下階層往房租金，政府俾多2000元津貼俾低下層，劏房業主即刻加租1500元食你一大半，認真討厭。第二是街邊零售店舖大加租，業主加完租，茶餐廳大加食物價，打工仔就抱怨自己加得雞碎咁多人工，剩係食飯都無晒。
本來政府做嘢要穩，慢慢研究清楚才做都好難深責。不過睇張局長連人地話政府轉軚想實施租管都要澄清，我估佢提到租管都只係一個拖字訣，以免長策會出諮詢報告時太難睇。唔好俾我批死，政府再拖得一兩年，租金再升，被逼埋牆角時才搞租管，一搞就遇上樓市冧埋，真係做得來都蚊瞓囉。
盧永雄
名嘴李慧玲昨日在記者會上燒陳志雲的諸多證據，比較多汁（juicy）的是講到志雲大師認為自己被政府官追殺，係因為李慧玲在節目批評政府。不過法律界對此觀點就不敢苟同啦。
慧玲姐昨日話，2013年3月陳志雲打贏官司脫罪 政府馬上去上訴，陳志雲對她說，政府擺明整他，因為他在商台做，而李慧經常在節目中批評政府，所以政府針對他。
陳志雲今日在節目中反駁話，李慧玲將被解僱一事，牽涉到他個人福祉及未完的官司，內容荒謬，指控嚴重，他深表遺憾，希望對方拿出確實證據。
無論志雲大師有無講過，就事實而言，若有人認為政府馬上上訴係因為志雲大師做商台或商台批評政府的話，那就肯定捉錯用神啦，真正咬住唔放的人，是前刑事檢控專員薛偉成。
陳志雲單官司大致係咁，在區域法院初審，法官潘兆童判陳志雲無罪，律政司上訴，話法官以「合理辯解」為理由，話陳志雲一直有做外面的工作有收錢，所以認為無線同意他做涉案的除夕倒數活動兼收錢，但控方話辯方根本無在庭上提出「合理辯解」這個辯護理由，只是法官在判詞中提出，雙方未曾在庭上陳述有關論據。結果同意上訴，發還區院重審。但區院潘兆童法官在去年三月再判陳志雲無罪。其後律政司再提上訴。李慧玲所指就是這次判決和上訴。
當時的刑事檢控專員是薛偉成，他現已轉任高院法官。薛偉成是希臘裔人，持澳洲護照，人權律師出身，曾做澳洲廉署，以「咬住唔放」見稱。薛偉成唔會去聽商台，亦唔會理商台批唔批評政府，佢根本係「無面俾」那一類人，告人一路告到底。你話特首CY指得郁薛偉成，真係講都無人信，不止CY，即使是律政司司長袁國強，對住薛偉成講嘢都要就住嚟講，廢事叫佢做乜唔做乜，佢唔理，搞到自己無癮啦。
就係因為薛偉成咬住唔放，所以才有新地案要告許仕仁和郭氏兄弟，佢根本就係無面俾。若果陳志雲以為政府馬上去上訴，係因為CY政府明整他，就顯示佢對香港的執法、司法制度好唔了解啦，都唔知邊個郁緊佢，佢會唔會蠢到呢個田地呢？對薛偉成稍有認識的人都知道，叫佢唔告人好難，如果以為CY可以指點佢，咁就真係有點天真啦。
盧永雄
