政府示強硬 撲滅於萌芽

一批網民到廣東道「驅蝗行動」反自由行，結果玩到三高官齊齊出動狠批。

 

先係管旅遊的蘇局長先開火，話佢哋咁做，嚴重損害香港的聲譽，傳媒都未消化完蘇局長火力，轉頭保安局同政制及內地事務局的黎局長同譚局長又企埋出嚟，對事件表示非常關注及遺憾，譚局長仲話小部份人的行為「野蠻、較為不文明舉動」，違背主流價值觀。

 

三個官員輪流發炮的場面好耐冇見，有人奇怪，部分反自由行的人，間中都表現得激啲架啦，點解今次政府反應咁大。相信今次網民去到內地遊客最多的地方咁樣指罵內地旅客，政府都幾關注，萬一再次挑起咗中港矛盾，有可能星星之火足以燎原。

 

雖則大部分香港人未必同意咁樣搞啲遊客，但太大量的自由行遊客訪港，確實令港人日常生活受到影響，正如蘇局長話過，等車可能要等耐啲。當大家都理性地去諗，問題可能不大，但只有稍不理性的火苗蔓延，咁就好難處理。政府今次咁高調咁有計劃地企晒出來表態，睇怕都係想將事件消滅於萌芽階段。

巴士的 Gossip

** 博客文章文責自負,不代表本公司立場 **

最近打開facebook，見到好多人都會有條獨家片段，因為facebook多咗「Look back」功能，可以將你過往post過的照片整成短片，睇吓邊啲留言和相，最多朋友like過。

 

網上有位叫「FANS CY」的用戶上載條片到YouTube ，好正面咁去睇CY的政策。連CY同「路姆西」的合照都放上去，講到制裁菲律賓，仲整咗句金句︰「同賓仔談判，為了家屬和公義，我可以去到幾盡？」片中畫面仲搞到有500萬個like㖭： 

 

上載條片的Fans CY留言話「我亦都唔怕認係撐CY, 而我更加係撐香港!!!!」仲揚言話預咗俾人搞咁話，好有戰鬥格。

 

條片會唔會係官方出品呢，特首辦就澄清話根本唔知有這段片。

 

咁啱係早個禮拜有網民在 YouTube上載條片，叫「梁振英的Facebook Lookback 689臉書的驀然回首」片放咗上網：

 

有二萬幾人睇過，條片以負面角度解讀CY，仲留言話：「如果佢都有玩FACEBOOK LOOK BACK，又會係點既樣架呢?」睇嚟Fans CY好似整翻條片回應人家喎，因為佢留言係：「如果梁振英真的有段FACEBOOK LOOK BACK應該會係咁。」

 

係咪開始埋身肉搏就唔知喇，淨係知，睇完條兩片最好開心應該係FB老細朱克伯格(Mark Zuckerberg)，兩條片都話CY 1954年加入FB，計吓數FB咪至少成六十歲囉，咁有生命力的社交網站，掂啦。

 

巴士的團隊