社交網埋身肉搏戰

最近打開facebook，見到好多人都會有條獨家片段，因為facebook多咗「Look back」功能，可以將你過往post過的照片整成短片，睇吓邊啲留言和相，最多朋友like過。

 

網上有位叫「FANS CY」的用戶上載條片到YouTube ，好正面咁去睇CY的政策。連CY同「路姆西」的合照都放上去，講到制裁菲律賓，仲整咗句金句︰「同賓仔談判，為了家屬和公義，我可以去到幾盡？」片中畫面仲搞到有500萬個like㖭： 

 

上載條片的Fans CY留言話「我亦都唔怕認係撐CY, 而我更加係撐香港!!!!」仲揚言話預咗俾人搞咁話，好有戰鬥格。

 

條片會唔會係官方出品呢，特首辦就澄清話根本唔知有這段片。

 

咁啱係早個禮拜有網民在 YouTube上載條片，叫「梁振英的Facebook Lookback 689臉書的驀然回首」片放咗上網：

 

有二萬幾人睇過，條片以負面角度解讀CY，仲留言話：「如果佢都有玩FACEBOOK LOOK BACK，又會係點既樣架呢?」睇嚟Fans CY好似整翻條片回應人家喎，因為佢留言係：「如果梁振英真的有段FACEBOOK LOOK BACK應該會係咁。」

 

係咪開始埋身肉搏就唔知喇，淨係知，睇完條兩片最好開心應該係FB老細朱克伯格(Mark Zuckerberg)，兩條片都話CY 1954年加入FB，計吓數FB咪至少成六十歲囉，咁有生命力的社交網站，掂啦。

 

巴士的團隊

巴士的 Gossip

** 博客文章文責自負,不代表本公司立場 **

趁住新正頭，下月底卸任的港大校長徐立之，最後一次以校長身份主持新春團拜，順道跟相識多年的傳媒朋友道別。

臨別在即，記者追問徐校長有何打算？佢話人生即將進入新一頁，未決定將來擔任甚麼工作，但直言對政治興趣不大，亦無政府中人搵佢擔任公職喎。

有機構已經邀請徐立之加盟，但佢話要留待四月一日先傾得，但就開出新工的條件︰唔使負太大責任、有房屋福利，仲有最緊要做得開心。

工作開心固然重要啦，咁徐校長主政港大十一年，有無咩嘢憾事？係咪兩年多前時任國務院副總理李克強訪港，引發軒然大波的「818事件」呢？仲記得當時徐立之成為眾矢之的，仲被批評斷送港大百年聲譽。

徐立之無正面回應，只係話校內外有唔同聲音，最重要是大學維持學術自由。

徐立之已經同繼任人馬斐森見過幾次面，講吓學校行政工作，但佢話唔會指指點點或者教對方做校長，因為社會係咁變，「今日啱用，聽日都未必用得著」。

講返卸任在即，徐立之呢排忙於搬屋，話晒喺大學道一號的校長樓住咗十年，校長話今次搬屋，總共執左十幾箱「垃圾」出黎。

唔係卦？貴為大學校長，又係國際遺傳學權威，屋企斷唔會收埋咁多垃圾卦？徐立之話呢啲係佢當年研究的基因展示圖就真。佢話以前搵大學教席，要以展示圖證明研究成果，愈儲愈多，但時至今日，學術界邊個唔識徐立之，搵工都唔使靠佢地啦。

徐立之仲笑笑口話︰「呢啲圖對我就有價值，但對呢個世界就無晒價值囉！」

今次翻箱倒籠，仲幫徐立之搵返童年回憶，就係佢人生第一本日記簿，當時係1963年，計落即係佢12、13歲時，但徐立之無再打開嚟睇，唔通前事不堪回首？

不過佢就有重溫小學時代的紀念冊，睇吓班書友仔寫咗啲咩！佢話有個同學寫咗句︰「Time is money！」送俾佢。嘩，原來當年的小學生已經咁現實！