趁住新正頭，下月底卸任的港大校長徐立之，最後一次以校長身份主持新春團拜，順道跟相識多年的傳媒朋友道別。
臨別在即，記者追問徐校長有何打算？佢話人生即將進入新一頁，未決定將來擔任甚麼工作，但直言對政治興趣不大，亦無政府中人搵佢擔任公職喎。
有機構已經邀請徐立之加盟，但佢話要留待四月一日先傾得，但就開出新工的條件︰唔使負太大責任、有房屋福利，仲有最緊要做得開心。
工作開心固然重要啦，咁徐校長主政港大十一年，有無咩嘢憾事？係咪兩年多前時任國務院副總理李克強訪港，引發軒然大波的「818事件」呢？仲記得當時徐立之成為眾矢之的，仲被批評斷送港大百年聲譽。
徐立之無正面回應，只係話校內外有唔同聲音，最重要是大學維持學術自由。
徐立之已經同繼任人馬斐森見過幾次面，講吓學校行政工作，但佢話唔會指指點點或者教對方做校長，因為社會係咁變，「今日啱用，聽日都未必用得著」。
講返卸任在即，徐立之呢排忙於搬屋，話晒喺大學道一號的校長樓住咗十年，校長話今次搬屋，總共執左十幾箱「垃圾」出黎。
唔係卦？貴為大學校長，又係國際遺傳學權威，屋企斷唔會收埋咁多垃圾卦？徐立之話呢啲係佢當年研究的基因展示圖就真。佢話以前搵大學教席，要以展示圖證明研究成果，愈儲愈多，但時至今日，學術界邊個唔識徐立之，搵工都唔使靠佢地啦。
徐立之仲笑笑口話︰「呢啲圖對我就有價值，但對呢個世界就無晒價值囉！」
今次翻箱倒籠，仲幫徐立之搵返童年回憶，就係佢人生第一本日記簿，當時係1963年，計落即係佢12、13歲時，但徐立之無再打開嚟睇，唔通前事不堪回首？
不過佢就有重溫小學時代的紀念冊，睇吓班書友仔寫咗啲咩！佢話有個同學寫咗句︰「Time is money！」送俾佢。嘩，原來當年的小學生已經咁現實！
巴士的 Gossip
** 博客文章文責自負,不代表本公司立場 **
嘩！嘩！原來正在籌備的《香港晨報》，果然係同夏萍有關，早前行內已傳出《香港晨報》同暫時停刊的《新晚報》老總夏萍有關，大家仲記唔記得邊個夏萍，本網曾報道佢舉行過咗個「史上最騎呢記者會」，新晚報又出過一份原子筆寫「史上最騎呢的通告」。
有人放料俾網上傳媒《852郵報》，收到一份疑為《香港晨報》的報刊註冊登記文件，顯示該報的承印公司名為All Leader Publication Group Ltd.，由夏萍和霍漢的公司控股，即係晨報的承印公司由夏萍控制。
呢位夏萍女士早前搞咗份《新晚報》，暫時停咗刊，但佢間公司並冇印刷能力，佢間公司點承印《香港晨報》呢? 當然可以將印刷再判出去，之前佢份《新晚報》都係搵深圳特區報在深圳印刷，如果由《深圳特區報》承印《香港晨報》，咁就有趣喇。
何解？由深圳特區報做印刷，開機關機咪由北大人掌握囉，新晚報被外界認為左派報紙，可以在深圳印刷冇咩出奇。一份獨立中立的報章可以喺深圳印，就有趣囉。需知道非大陸系統香港報紙要在內地印刷然後出境，一啲都唔易喎。
想當年，要數到上世紀九十年代，《星島》仍是胡仙年代時，胡女士就曾經在蛇口買塊地打算起廠印刷，本來諗住有著數，節省唔少成本，點知後來發現在內地做印刷好多限制，例如唔可以印敏感，否則隨時封廠，印刷好的報紙出境需要檢查同得到批准啦，隨時要驗唔可以出境。只有三份內地官方營運的左派報紙先可以在內地印完運出境。結果胡仙得物地無所用，要放棄在內地印報紙的計劃。
號稱中立的報紙，內容有時都會幾敏感，如果《香港晨報》成功爭取在深圳印刷，又可以輕易運出境，咁其他香港中立報紙咪可以有樣學樣，要求上去內地印囉，咁咪可以節省成本囉?
睇嚟《香港晨報》唔係阿爺的報紙，睇佢可唔可以在深圳印就知。其實印刷問題係《香港晨報》面對的一大技術難關，若佢要印二十萬份，在香港可承印公司有數得計，最有能者相信不出東方和蘋果，問題係《香港晨報》和兩大報業集團直接競爭，它們會承印嗎? 所以講來講去，印刷係《香港晨報》出唔出到的核心問題之一。
巴士的團隊
