霸戲哥之日常#035 │ John Woo

早兩日電影台又翻播《賭俠大戰拉斯維加斯》。呢類戲無論睇咗幾多次，你都會噒到完場，直至碌晒roller credit連汁都撈埋。

有幕劉華同阿叻搵王晶拍戲，其間就拎大導演吳宇森John Woo嚟玩，睇親都笑到黐線。

「Leonardo Di Lilumi吖嘛，呢個月睇第三次啦！」豬視妹又鬧。

吳宇森係威嘅。當年先後拍咗《Broken Arrow》（斷箭行動，1996）、《Face Off》（奪面雙雄，1997）同《Mission Impossible 2》（職業特工隊，2000）等荷里活猛片，直頭係華人導演之光。不過自從佢拍完《Paycheck》（致命報酬，2004）之後，就告別荷里活，據聞係頂唔順荷里活啲綁手綁腳嘅制度。

不過世事冇絕對。事隔近20年，吳宇森又再拍番荷里活電影《Silent Night》，日前仲喺墨西哥開鏡。《Silent Night》有《自殺殺攻》（The Suicide Squad）男星Joel Kinnaman

做男主角，成齣戲係零對白齋動作，唔知大導演可唔可以將佢嘅暴力美學發揮到極致呢？

不過，霸戲哥最期待依然係白鴿飛過嘅畫面。

「試吓白鴿頭對住我。試吓白鴿屁股對住我。唔要隻白鴿啦⋯⋯」

霸戲哥

** 博客文章文責自負,不代表本公司立場 **

疫情嚴峻，撇除前線班醫護，計落最辛苦都應該係速遞員。送水捧餐托米零貼士事小，隻身穿梭疫廈都未算慘，眼見同事輪住中招，一人做幾個人嘢，莫講食飯，連肚痛都唔敢屙。

偏偏有啲茂梨，唔感激速遞員不得止，仲係都要搞到人哋冇咗份工先安樂。

事緣有位速遞哥哥為咗爭取少少食飯時間，靜靜匿埋一邊，坐喺回收筒旁起勢咁扒。點知好事茂梨以衞生為由，偷影完人再放上網公審。

詳情自行去小西灣富景花園居民聯絡組了解。睇見各路英雄留言之踴躍，相信茂梨已經得到應有報應。

又咁諗，冇咁醜陋嘅人，又點襯托出阿Bob林盛斌嘅高尚？阿Bob亦係第一位為呢件事抱不平嘅藝人，又話若果速遞哥哥畀人投訴到冇咗份工，會私人醒份過佢。

So generous。

阿Bob平時扮鬼扮馬，唔介意醜化自己做下把畀人笑，但去到呢啲位，最古道熱腸嗰個亦係佢。

香港，勝在有正義之Bob。