博客文章
不得承應，霸戲哥今鋪真係跌晒眼鏡。原以為無綫套《家族榮耀》都係類似現代版《金枝慾孽》crossover《溏心風暴》，同一般女人爭產劇冇乜分別，點估到今晚大結局，係我要求豬視妹陪我睇。
令霸戲哥改觀嘅，係個劇本結構紮實，唔會突然大暴走，雖然都偶有出現膠化情節，但整體都可以接受。而每位出現角色都有其陰暗面，性格轉變唔會太突兀，都係順住劇本走。呢點，幾位編劇蔡淑賢、廖雨琦、蘇侃風同馮偉濤應記一功。
至於去到結局篇，楊怡（即楊茜堯）演技大爆發由頭帶到落尾，嗰種善良外表包裝住嘅邪惡，真係由骨到滲出嚟。所以話，「最毒婦人心」我時刻記住，同咪千祈咪得罪女人。
結局唔算太出人意表，而臨尾出場嘅羅嘉良亦唔算驚喜（預告出晒啦），相信係為續集鋪路啦。
霸戲哥
** 博客文章文責自負,不代表本公司立場 **
57歲嘅金像影后Sandra Bullock宣布暫時息影，未來幾年會花多啲時間照顧一對養子女，盡番阿媽責任。
從來都唔係Sandra Bullock粉絲。撇除佢個名好似讀極都讀唔到，就覺得佢個樣硬係怪怪哋，個口仲大過某位倒米KOL。需知同期荷里活女星隨口數埋一堆，Meg Ryan、Demi Moore、Winona Ryder全部女神級，Sandra點會係霸戲哥杯茶。
到中學某年，個個同學都講緊《生死時速》（扮緊奇洛李維斯先真），先開始留意Sandra，之後嘅《選美俏臥底》同續集係有睇，但對於呢類傻大姐角色冇乜特別鍾愛，就算佢憑《The Blind Side》拎Oscar影后，我都唔覺得佢演得特別好，只係嗰屆對手比較弱，又或者「夠鐘」頒啦。反而同年Sandra憑《All About Steve》拎最爛演技金草霉獎，佢親自上台領獎，佢展現嘅氣度先令我刮目相看。
近年Sandra已大幅減產，原來對上一部睇佢嘅戲已經係Netfilx嘅《蒙上你的眼》，哈，我都係覺得好一般。遲啲有機會先睇埋佢套《無赦》。
Anyway，祝Sandra短暫退休生活愉快。
