霸戲哥之日常#048 │ King Will

大威同細威有幾威，根本唔使多講，喺網球場上見到晒。但一手栽培佢哋成為世一嘅老竇Richard Williams，就未必咁多人知，自然成為絕佳嘅電影題材。

《King Richard》（王者世家）就係食呢條橋，由Richard（韋史密夫飾）點樣為女兒規劃目標，到地獄式育成兩女，至慢慢睇住佢哋成材，係好典型勵志故仔。只要再附帶少少種族平等呢啲「食糊」議題，就可以輕鬆入圍角逐奧斯卡最佳電影。

雖然普遍人對套戲有讚冇彈，霸戲哥就覺得其實好一般。公式化嘅體育人物傳記，始終有太多計算過嘅商業元素，而Richard更好似神人一樣，無論遇到乜嘢挫折，都堅持執行佢嘅計劃，自信心爆棚，但明明佢本身就成日做逃兵。

我諗套戲成功只得兩個元素：大威細威、韋史密夫。韋史密夫用咗最大嘅奶力，摵甩佢陣男子氣概，飾演一個不太cool嘅老竇，平時因黑人身份同低下職業而自卑，但被剝削或遇不公時又理直氣壯，幾個爆發位更做得恰到好處。

韋史密夫已先後拎咗BAFTA、金球獎、影評人之選最佳男主角，睇嚟好大機會喺奧斯卡開齋。

霸戲哥

** 博客文章文責自負,不代表本公司立場 **

奬門人曾志偉終於出山做節目。喺依家咁鬱悶嘅時勢，香港人都叫做有番啲笑聲同娛樂。

節目叫《講你都唔信》（點解我要信？），今晚起逢星期一至星期三喺TVB翡翠台播出，除咗志偉，主持仲有錢嘉樂、馮盈盈、丁子朗、鄭衍峰、江嘉敏、方紹聰同林秀怡。睇牌面，都係走熱熱鬧鬧格局。

首集主題係「人生中最瘀的事」，嘉賓輪流分享經歷，叫大家估下堅定流。不過大家對「瘀」嘅定義好唔同，有人覺得對住塊鏡講粗口會打冷震，亦有人偷食斷正都若無其事。

至於霸戲哥，人生最瘀莫過於喺學校瀨屎，時為1985年。堅嘅。

修正，人生最瘀應該係呢刻同大家分享呢件瘀事。