博客文章
奬門人曾志偉終於出山做節目。喺依家咁鬱悶嘅時勢，香港人都叫做有番啲笑聲同娛樂。
節目叫《講你都唔信》（點解我要信？），今晚起逢星期一至星期三喺TVB翡翠台播出，除咗志偉，主持仲有錢嘉樂、馮盈盈、丁子朗、鄭衍峰、江嘉敏、方紹聰同林秀怡。睇牌面，都係走熱熱鬧鬧格局。
首集主題係「人生中最瘀的事」，嘉賓輪流分享經歷，叫大家估下堅定流。不過大家對「瘀」嘅定義好唔同，有人覺得對住塊鏡講粗口會打冷震，亦有人偷食斷正都若無其事。
至於霸戲哥，人生最瘀莫過於喺學校瀨屎，時為1985年。堅嘅。
修正，人生最瘀應該係呢刻同大家分享呢件瘀事。
霸戲哥
** 博客文章文責自負,不代表本公司立場 **
今年奧斯卡最佳電影，Jane Campion套《The Power of the Dog》（犬山記）暫時呼聲最高，但Sian Heder套《CODA》後勁凌厲，啱啱喺BAFTA奪得最佳改編劇本同最佳男配角（Troy Kotsur），加上有外媒加持，隨時以黑馬姿態跑出。
CODA，即child of deaf adults意思，故事講述Ruby（Emilia Jones）出生喺聾人家庭，佢係唯一健聽人士，順理成章成為翻譯傳話嘅工具。Ruby後來發現自己嘅歌唱天份，一心想讀音樂學院，但就會令屋企失去支柱。喺追夢同家人之間，Ruby要作出取捨。
呢類以聽障為主題嘅電影，通常都以聽障人士為主角，好似台灣嘅《無聲》，都會導向觀眾同情主角嘅遭遇。《CODA》調番轉，去番健聽者嘅角度出發，其實佢哋同樣承受好大壓力同委屈。
《CODA》得到好評，Emilia Jones嘅神采演出固然應記一功，幾位真實嘅聾人演員Troy Kotsur、Marlee Matlin同Frank Rossi亦係功不可沒，尤其有幕Troy Kotsur用心去聆聽阿女嘅歌聲，鐵石造嘅人都會感動到。
有別一貫爭Oscar嘅左膠大愛電影，《CODA》勝在真摯唔虛偽，輕鬆幽默得嚟亦令人感動。佢拎最佳電影嘅話，霸戲哥最開心。
