霸戲哥之日常#046 │ 心之聆聽

今年奧斯卡最佳電影，Jane Campion套《The Power of the Dog》（犬山記）暫時呼聲最高，但Sian Heder套《CODA》後勁凌厲，啱啱喺BAFTA奪得最佳改編劇本同最佳男配角（Troy Kotsur），加上有外媒加持，隨時以黑馬姿態跑出。

CODA，即child of deaf adults意思，故事講述Ruby（Emilia Jones）出生喺聾人家庭，佢係唯一健聽人士，順理成章成為翻譯傳話嘅工具。Ruby後來發現自己嘅歌唱天份，一心想讀音樂學院，但就會令屋企失去支柱。喺追夢同家人之間，Ruby要作出取捨。

呢類以聽障為主題嘅電影，通常都以聽障人士為主角，好似台灣嘅《無聲》，都會導向觀眾同情主角嘅遭遇。《CODA》調番轉，去番健聽者嘅角度出發，其實佢哋同樣承受好大壓力同委屈。

《CODA》得到好評，Emilia Jones嘅神采演出固然應記一功，幾位真實嘅聾人演員Troy Kotsur、Marlee Matlin同Frank Rossi亦係功不可沒，尤其有幕Troy Kotsur用心去聆聽阿女嘅歌聲，鐵石造嘅人都會感動到。 

有別一貫爭Oscar嘅左膠大愛電影，《CODA》勝在真摯唔虛偽，輕鬆幽默得嚟亦令人感動。佢拎最佳電影嘅話，霸戲哥最開心。

霸戲哥

** 博客文章文責自負,不代表本公司立場 **

霸戲哥打完第二針疫苗，成個人溫溫燉燉，個肚咕嚕咕嚕咁響。昏昏沉沉之際，豬視妹突然隊杯血紅色嘅嘢埋嚟，叫我乾咗佢。心諗，打完針要補血咩？

「羽衣甘藍紅菜頭菠蘿汁嚟架，叫你飲就飲啦！」又紅又藍咁，不過飲落係得嘅，不愧為天才小廚師。

原來豬視妹早排睇完無綫套《煮‧嘢食》，肥媽教落將用剩嘅羽衣甘藍莖，加埋菠蘿打汁，就炮製到醒神又醒胃嘅健康飲料。跟肥媽煮嘢，點煮都唔太hea。

羽衣甘藍，個名聽落勁似啲AV女優，唔講唔知，原來打邊爐都有得食。至於佢嘅功效就巴閉，有助降膽固醇啦、幫助免疫系統啦、強健骨骼健康啦、預防心臟疾病啦，預防癌症啦，仲有就係有助減肥瘦身添。

「咁點解有羽衣甘藍嘅莖嘅？啲葉去晒邊？」我嘗試突破盲腸。

只見豬視妹匿埋一角，自私食緊蘋果紅菜頭羽衣甘藍沙律。