霸戲哥之日常#056 │ 芬蘭慾

豬視妹一直想去芬蘭睇極光，可惜我耳水不平衡，搭長途機等於直接判我死刑，即刻睇到耶穌光。我等Christy呢個節目《芬蘭潮什麼》好耐，以為睇咗可以當去咗，我覺得。

一連6集嘅《芬蘭潮什麼》今日起，逢星期四、五夜晚10點半喺TVB翡翠台播出，第一集Christy先會帶大家去芬蘭北部嘅拉普蘭區（Lapland），仲設計咗個三日兩夜嘅懶人包，用最少時間同金錢拜訪聖誕老人同睇極光，一次滿足晒豬視妹三個願望。

我對芬蘭最深刻嘅印象，並唔係聖誕老人同極光（當然亦唔係芬蘭浴，笑），係佢哋嘅快樂指數。聯合國啱啱公佈2022全球快樂指數，芬蘭連續5年蟬聯最快樂國家，而我哋呢，排緊81。唔怪之得咁多香港人想去芬蘭，想尋開心嘛。

我開始擔心，豬視妹睇完呢輯《芬蘭潮什麼》，更想迫我搭長途機……

霸戲哥

** 博客文章文責自負,不代表本公司立場 **

居家抗疫抗到悶悶哋，無聊打開Netflix睇吓啲另類嘢，居然有意外收穫。遊戲節目《Is it Cake?》（真‧蛋糕）啱啱上架，霸戲哥同豬視妹坐定定睇咗集，嘻嘻哈哈又消磨咗半粒鐘。

個節目其實係有班超強糕點師參賽者，輪流炮製一個實物形體嘅蛋糕，如果成功呃到班評判，就可以贏取巨額獎金（大拿拿一萬美金）。班參賽者為咗獎金旋展渾身解數，又上色又雕刻，超級認真。講到尾，節目其實係飲食節目，只不過係用遊戲同獎金嚟包裝。真係佩服佢哋嘅創意。

觀眾都可以玩埋一份，好似我同豬視妹咁，就喺電視機外side bet，賭吓邊個先係真蛋糕。結果當然係天才小廚師贏晒，累我輸咗幾罐可樂。

吖，唔知香港搞呢類型節目又得唔得呢？又或者搵嗰班「淘寶糕點師」，整啲甩頭甩骨嘅蛋糕娛賓，諗起都笑死。