博客文章
居家抗疫抗到悶悶哋，無聊打開Netflix睇吓啲另類嘢，居然有意外收穫。遊戲節目《Is it Cake?》（真‧蛋糕）啱啱上架，霸戲哥同豬視妹坐定定睇咗集，嘻嘻哈哈又消磨咗半粒鐘。
個節目其實係有班超強糕點師參賽者，輪流炮製一個實物形體嘅蛋糕，如果成功呃到班評判，就可以贏取巨額獎金（大拿拿一萬美金）。班參賽者為咗獎金旋展渾身解數，又上色又雕刻，超級認真。講到尾，節目其實係飲食節目，只不過係用遊戲同獎金嚟包裝。真係佩服佢哋嘅創意。
觀眾都可以玩埋一份，好似我同豬視妹咁，就喺電視機外side bet，賭吓邊個先係真蛋糕。結果當然係天才小廚師贏晒，累我輸咗幾罐可樂。
吖，唔知香港搞呢類型節目又得唔得呢？又或者搵嗰班「淘寶糕點師」，整啲甩頭甩骨嘅蛋糕娛賓，諗起都笑死。
霸戲哥
** 博客文章文責自負,不代表本公司立場 **
因為「戚其義」三個字，我居然裝咗象徵亞視永恆嘅AMM心娛app。相信唔使用文字去說服大家，阿戚出品嘅劇集有幾好睇，《天地男兒》、《創世紀》、《天與地》求其數幾套，唔晒冷已經拋窒你。
今次阿戚出山製作新劇《逐流時代》，今個月29號就會喺心娛app度首播。阿戚話，套劇係關於香港人嘅故事，係純本地創作，希望帶畀我哋一個全新嘅觀劇感受。
套劇以社會病態為故事核心，講年輕人力爭上「流」嘅故事，示範點樣喺濁流上隨波。呢幾年香港立立亂，後生仔又冇乜向上流動機會，睇嚟套劇幾啱佢哋口味。
霸戲哥就比較期待麥明詩同麥子樂呢對「雙麥配」。就咁睇流出嘅劇照，麥明詩激咀黃德斌固然有睇頭，但最開心都係見到麥子樂擔正。
成日覺得麥子樂係嚴重underrated嘅演員。睇佢近年嘅演出，就算戲份唔多，但都好用心去演，而且安守本分，唔會搶主角風頭。阿戚又點會睇漏眼。
或者，呢個都係麥子樂力爭上流嘅演出機會。要爭氣呀！
