呢輪寧舍多玩穿越同平行時空嘅劇，或者食住元宇宙條水啦，今日又有套法國科幻劇《平行宇宙少年》（Parallels）喺 Disney+ 上架。
故事講述四個住喺山區小鎮嘅細路，某日因一場神秘事件，誤打誤撞進入咗平行宇宙。四人分別出現喺唔同時空嘅宇宙，要慢慢了解自己嘅處境，克服當前困難，再諗辧法逆轉時間，先可以返番去屬於佢哋嘅原來世界。聽落即係《Dark》X《Stranger Things》X《Butterfly Effect》啦。
呢類時空扭轉劇，最弊就係吹大個頭而連唔到個尾。呢套《平行宇宙少年》只有6集，每集約40分鐘，短短哋易入口，相信唔會露出太多破綻同反駁位。
睇呢啲劇，霸戲哥成日有個疑惑，就係點解主角一定要返番去屬於自己嘅時空？點解唔可以好似《上海灘賭聖》嘅大軍咁，留番喺1937年嘅上海做大爺先！
霸戲哥
** 博客文章文責自負,不代表本公司立場 **