原來《低俗喜劇》已經拍咗十年，杜汶澤噚日喺fb問大家想唔想拍續集，有佢就去馬籌備，引起哄動。睇嚟呢幾年大家都攰啦（對騾仔仲攰），想搵啲笑料嚟虎中作吓樂，霸戲哥梗係舉腳支持。
《低俗喜劇》講喺香港拍戲嘅辛酸，尤其係做監製，搵老細科水投資慘過捱騾仔（結果要騎埋騾仔）。十年過去，喺香港拍戲難上加難，拍續集嘅題材不缺，但橫睇掂睇都係悲劇，點變成喜劇就好考編導功夫。
演員方面，阿澤、雷宇揚、暴龍哥、音音姐呢啲鐵膽冇得換，就好似咸酸菜炒牛歡喜，定律嚟。阿澤屬意搵游學修做主角，我就覺得點都要留番個角色畀蕭生，話晒佢睇死港產片咁多年。
講番正經，《低俗喜劇》真係一齣劃時代電影，當年掀起新一輪港產片文化，好似巡迴謝票呀，social media宣傳咁，最重要都係令更多人認識「高登先」——一個不可或缺嘅港產片推手。
《低俗喜劇》帶畀霸戲哥好多美好嘅回憶，唯一挑剔係，散場時拎嗰包爆炸糖味道很一般。
霸戲哥
** 博客文章文責自負,不代表本公司立場 **