霸戲哥之日常#053 │ 低俗悲劇

原來《低俗喜劇》已經拍咗十年，杜汶澤噚日喺fb問大家想唔想拍續集，有佢就去馬籌備，引起哄動。睇嚟呢幾年大家都攰啦（對騾仔仲攰），想搵啲笑料嚟虎中作吓樂，霸戲哥梗係舉腳支持。

《低俗喜劇》講喺香港拍戲嘅辛酸，尤其係做監製，搵老細科水投資慘過捱騾仔（結果要騎埋騾仔）。十年過去，喺香港拍戲難上加難，拍續集嘅題材不缺，但橫睇掂睇都係悲劇，點變成喜劇就好考編導功夫。

演員方面，阿澤、雷宇揚、暴龍哥、音音姐呢啲鐵膽冇得換，就好似咸酸菜炒牛歡喜，定律嚟。阿澤屬意搵游學修做主角，我就覺得點都要留番個角色畀蕭生，話晒佢睇死港產片咁多年。

講番正經，《低俗喜劇》真係一齣劃時代電影，當年掀起新一輪港產片文化，好似巡迴謝票呀，social media宣傳咁，最重要都係令更多人認識「高登先」——一個不可或缺嘅港產片推手。

《低俗喜劇》帶畀霸戲哥好多美好嘅回憶，唯一挑剔係，散場時拎嗰包爆炸糖味道很一般。

霸戲哥

** 博客文章文責自負,不代表本公司立場 **

因為「戚其義」三個字，我居然裝咗象徵亞視永恆嘅AMM心娛app。相信唔使用文字去說服大家，阿戚出品嘅劇集有幾好睇，《天地男兒》、《創世紀》、《天與地》求其數幾套，唔晒冷已經拋窒你。

今次阿戚出山製作新劇《逐流時代》，今個月29號就會喺心娛app度首播。阿戚話，套劇係關於香港人嘅故事，係純本地創作，希望帶畀我哋一個全新嘅觀劇感受。

套劇以社會病態為故事核心，講年輕人力爭上「流」嘅故事，示範點樣喺濁流上隨波。呢幾年香港立立亂，後生仔又冇乜向上流動機會，睇嚟套劇幾啱佢哋口味。

霸戲哥就比較期待麥明詩同麥子樂呢對「雙麥配」。就咁睇流出嘅劇照，麥明詩激咀黃德斌固然有睇頭，但最開心都係見到麥子樂擔正。

成日覺得麥子樂係嚴重underrated嘅演員。睇佢近年嘅演出，就算戲份唔多，但都好用心去演，而且安守本分，唔會搶主角風頭。阿戚又點會睇漏眼。

或者，呢個都係麥子樂力爭上流嘅演出機會。要爭氣呀！