霸戲哥之日常#052 │ 麥子樂

因為「戚其義」三個字，我居然裝咗象徵亞視永恆嘅AMM心娛app。相信唔使用文字去說服大家，阿戚出品嘅劇集有幾好睇，《天地男兒》、《創世紀》、《天與地》求其數幾套，唔晒冷已經拋窒你。

今次阿戚出山製作新劇《逐流時代》，今個月29號就會喺心娛app度首播。阿戚話，套劇係關於香港人嘅故事，係純本地創作，希望帶畀我哋一個全新嘅觀劇感受。

套劇以社會病態為故事核心，講年輕人力爭上「流」嘅故事，示範點樣喺濁流上隨波。呢幾年香港立立亂，後生仔又冇乜向上流動機會，睇嚟套劇幾啱佢哋口味。

霸戲哥就比較期待麥明詩同麥子樂呢對「雙麥配」。就咁睇流出嘅劇照，麥明詩激咀黃德斌固然有睇頭，但最開心都係見到麥子樂擔正。

成日覺得麥子樂係嚴重underrated嘅演員。睇佢近年嘅演出，就算戲份唔多，但都好用心去演，而且安守本分，唔會搶主角風頭。阿戚又點會睇漏眼。

或者，呢個都係麥子樂力爭上流嘅演出機會。要爭氣呀！

霸戲哥

** 博客文章文責自負,不代表本公司立場 **

亞視一姐薛影儀，上年9月捲入一宗襲擊街坊同冇戴口罩案件，被控一項普通襲擊及沒有在指明公眾地方佩戴口罩兩罪。案件今在屯門法院提堂，阿儀承認兩罪，被判囚2星期，同罰款5000大元。佢透過代表律師申請保釋同上訴，獲法官批准。

阿儀fans梗係傷心啦，霸戲哥初初睇到啲新聞push話佢要即時收監，都打咗個突。踢兩腳同唔戴口罩啫，原來咁都要坐，好似玩大富翁咁抽中咗張即時入獄卡。霸戲哥唔熟法律，輕定重留返畀讀Law嘅人去判斷嘞。

之不過單睇嗰條瘋傳嘅片段，嗰位追人幾條街拍片嗰位姨姨，咄咄迫人咁挑釁一姐，先會令阿儀老羞成怒起飛腳。只可以講句，人怕出名豬怕肥。

希望阿儀今次吸收教訓，喺疫情期間都係戴番好個口罩。如果咁唔好彩要坐監，就當攞啲生活靈感，第時拍番齣《新女子監獄風雲》囉。

案件編號：TMCC431/2022