霸戲哥之日常#051 │ 亞視一姐

亞視一姐薛影儀，上年9月捲入一宗襲擊街坊同冇戴口罩案件，被控一項普通襲擊及沒有在指明公眾地方佩戴口罩兩罪。案件今在屯門法院提堂，阿儀承認兩罪，被判囚2星期，同罰款5000大元。佢透過代表律師申請保釋同上訴，獲法官批准。

阿儀fans梗係傷心啦，霸戲哥初初睇到啲新聞push話佢要即時收監，都打咗個突。踢兩腳同唔戴口罩啫，原來咁都要坐，好似玩大富翁咁抽中咗張即時入獄卡。霸戲哥唔熟法律，輕定重留返畀讀Law嘅人去判斷嘞。

之不過單睇嗰條瘋傳嘅片段，嗰位追人幾條街拍片嗰位姨姨，咄咄迫人咁挑釁一姐，先會令阿儀老羞成怒起飛腳。只可以講句，人怕出名豬怕肥。

希望阿儀今次吸收教訓，喺疫情期間都係戴番好個口罩。如果咁唔好彩要坐監，就當攞啲生活靈感，第時拍番齣《新女子監獄風雲》囉。

案件編號：TMCC431/2022

霸戲哥

** 博客文章文責自負,不代表本公司立場 **

好多香港人冇得去旅行會死，所以航空公司搞flycation，都大把人報名吊住命。原來香港人一樣有鋪聽演唱會癮，如果唔係今次第五波疫情，搞到好多活動包括演唱會剎停，霸戲哥都唔知原來豬視妹嘅毒癮係咁深。

喺聽到第三十二次陳奕迅演唱會之後，我終於忍唔住。

「可唔可以唔好係咁repeat你啲陳年演唱會？」唔發火你當我病貓。

「唔睇舊嘅演唱會，睇咩啫！」連隨一個搖控器飛埋嚟。好多命案就係因為咁而發生。　

好彩，霸戲哥今次叻仔，知道今晚8點，JW同星夢嘅Chantel、Windy同Yumi會搞個全球網上直播演唱會《Concert WFH》（watch from home），仲係由著名音樂人伍仲衡做音樂總監添。相信到時佢哋會唱出唔少《青春本我》入面嘅歌，同埋加插啲fans互動環節，就算唔可以現場感受，起碼隔住個芒都頂住癮先。

為咗平息呢次干戈，呢啲錢，抵畀。