霸戲哥之日常#050 │ 演唱會癮

好多香港人冇得去旅行會死，所以航空公司搞flycation，都大把人報名吊住命。原來香港人一樣有鋪聽演唱會癮，如果唔係今次第五波疫情，搞到好多活動包括演唱會剎停，霸戲哥都唔知原來豬視妹嘅毒癮係咁深。

喺聽到第三十二次陳奕迅演唱會之後，我終於忍唔住。

「可唔可以唔好係咁repeat你啲陳年演唱會？」唔發火你當我病貓。

「唔睇舊嘅演唱會，睇咩啫！」連隨一個搖控器飛埋嚟。好多命案就係因為咁而發生。　

好彩，霸戲哥今次叻仔，知道今晚8點，JW同星夢嘅Chantel、Windy同Yumi會搞個全球網上直播演唱會《Concert WFH》（watch from home），仲係由著名音樂人伍仲衡做音樂總監添。相信到時佢哋會唱出唔少《青春本我》入面嘅歌，同埋加插啲fans互動環節，就算唔可以現場感受，起碼隔住個芒都頂住癮先。

為咗平息呢次干戈，呢啲錢，抵畀。

霸戲哥

** 博客文章文責自負,不代表本公司立場 **

霸戲哥喺灣仔大，當年會展都未起好，附近亦冇乜餐廳。印象中，有間餐廳喺海外信托銀行附近（告士打道），價錢偏貴，只有大時大節阿媽先捨得帶我呢條化骨龍去食。間餐廳叫佳寧娜。

佳寧娜曾經係由佳寧集團經營，而佳寧集團呢個名，七、八十年代更加係響噹噹，仲曾經捲入詐騙、行賄同貪污案添。點解無啦啦講起佳寧集團？因為劉德華、梁朝華聯手演出嘅英皇電影《金手指》，故事藍本就係嚟自「佳寧集團案」。

呢套號稱投資咗3.5億嘅《金手指》，戲中華仔、偉仔同阿Sa蔡卓妍嘅造型亦首度公開，睇見着住老西嘅華仔偉仔正面對峙，眼神都好有戲，《無間道》個feel當堂返晒嚟。

「對唔住，我係ICAC。」

「邊個知？」

至於霸戲哥偶像阿Sa就更加唔使講，輕托香腮個迷人樣，既知性又賢淑。睇睇吓，佢髮型有啲似阿媽……

噢，有啲掛住佳寧娜添。