博客文章
一波十折嘅第40屆香港電影金像獎頒獎禮，終於有新嘅時間表。金像獎主席爾冬陞今日宣布，實體頒獎禮定喺今年7月17日，喺九龍灣國際展貿中心匯星舉行，記憶中亦係首次唔喺文化中心舉行（唔計網上頒獎嗰次）。
特首林鄭月娥話，下月21號開始，會分三個階段放寛社交距離措施，業界亦估計到時會先開放戲院等娛樂場所。所以今次改喺7月搞，霸戲哥都認為好穩陣，除非到時又爆第六波，touch wood先。
「咁點行紅地毯呢？」
「我知，喺油站嗰邊開始行！」豬視妹不加思索咁答。
Anyway，預祝香港電影金像獎順風順水，唔好再延期啦。
霸戲哥
** 博客文章文責自負,不代表本公司立場 **
豬視妹一直想去芬蘭睇極光，可惜我耳水不平衡，搭長途機等於直接判我死刑，即刻睇到耶穌光。我等Christy呢個節目《芬蘭潮什麼》好耐，以為睇咗可以當去咗，我覺得。
一連6集嘅《芬蘭潮什麼》今日起，逢星期四、五夜晚10點半喺TVB翡翠台播出，第一集Christy先會帶大家去芬蘭北部嘅拉普蘭區（Lapland），仲設計咗個三日兩夜嘅懶人包，用最少時間同金錢拜訪聖誕老人同睇極光，一次滿足晒豬視妹三個願望。
我對芬蘭最深刻嘅印象，並唔係聖誕老人同極光（當然亦唔係芬蘭浴，笑），係佢哋嘅快樂指數。聯合國啱啱公佈2022全球快樂指數，芬蘭連續5年蟬聯最快樂國家，而我哋呢，排緊81。唔怪之得咁多香港人想去芬蘭，想尋開心嘛。
我開始擔心，豬視妹睇完呢輯《芬蘭潮什麼》，更想迫我搭長途機……
