霸戲哥之日常#059 │ 金剛戰神

世上已經冇人可以阻止到荷李活片商將動畫變造真人電影。

經典動畫《金剛戰神》（Voltron）即將拍成真人版電影，暫敲定由《Red Notice》導演Rawson Marshall Thurber執導，同Ellen Shanman一齊寫劇本。有傳發行權競爭非常激烈，7 間片廠及串流媒體參與競標，包括華納兄弟、環球影業、Amazon等等，睇嚟大家當佢係舊肥豬肉。

霸戲哥其實到呢刻都未分到《金剛戰神》同《百獸王》，記憶中兩套卡通都喺亞視播過，仲要係差唔多時段播，又係啲獅子組成機械人儆惡懲奸嘅故仔，搞到亂晒龍。有錯嘅，亞視之友唔該幫忙糾正。

細個最鍾意《百戰王》入面隻綠獅子，性格調皮似我，而每次佢哋合體，我都會跟住一齊跑，諗起都覺低B。當然佢首主題曲「衝~鋒~用百戰出戰~」我係會跟住唱。

問題係，《金剛戰神》係咪即係《百戰王》？等佢拍出嚟先算啦。

霸戲哥

** 博客文章文責自負,不代表本公司立場 **

一波十折嘅第40屆香港電影金像獎頒獎禮，終於有新嘅時間表。金像獎主席爾冬陞今日宣布，實體頒獎禮定喺今年7月17日，喺九龍灣國際展貿中心匯星舉行，記憶中亦係首次唔喺文化中心舉行（唔計網上頒獎嗰次）。

特首林鄭月娥話，下月21號開始，會分三個階段放寛社交距離措施，業界亦估計到時會先開放戲院等娛樂場所。所以今次改喺7月搞，霸戲哥都認為好穩陣，除非到時又爆第六波，touch wood先。

「咁點行紅地毯呢？」
「我知，喺油站嗰邊開始行！」豬視妹不加思索咁答。

Anyway，預祝香港電影金像獎順風順水，唔好再延期啦。