霸戲哥之日常#060 │ 戴妃

近日盛傳哈里同梅根協議離婚，雖然佢兩個已經係平民身份，但斷估仍然為英國皇室製造唔少麻煩。

英國皇室從來引起全球目光，或者同佢哋重視傳統同保守有關。人類嘅好奇心係無限大，你越收收埋埋，人哋就越想揭你底牌。不過今次唔係講哈里，佢佢媽媽戴安娜皇妃。

戴妃人生最後嘅日子，相信我哋都好清楚。所以電影《Spencer》，將故事濃縮喺1991年嘅三天聖誕假期，等觀眾自行判斷戴妃嘅皇室生活有幾風光／坎坷。

電影偏向藝術型，節奏比較慢同悶，冇耐性嘅人隨時睇到瞌眼瞓。亦因為夠慢同冇乜對白，演員嘅演技更加容易捕捉，好唔好都無所遁形。

所以當初話Kristen Stewart演戴妃時人人唔睇好，結果當然跌晒銀鏡啦。佢由說話嘅口音、語速、停頓位同尾音，到行路嘅姿勢、速度、甚至膊頭傾斜度，都成功倒模。再配合埋眼神同面部表情變化，Kristen完全係脫胎換骨。難怪人人吹奏佢會當選今屆奧斯卡影后。

不過霸戲哥反而最欣賞幫戴妃換衫嘅Sally Hawkins，幾段戲都帶動到Kristen嘅情緒，奇怪係冇份提名奧斯卡最佳女配角。

至於Kristen開唔開到齋？我認為要問過Jessica Chastain先。

霸戲哥

** 博客文章文責自負,不代表本公司立場 **

世上已經冇人可以阻止到荷李活片商將動畫變造真人電影。

經典動畫《金剛戰神》（Voltron）即將拍成真人版電影，暫敲定由《Red Notice》導演Rawson Marshall Thurber執導，同Ellen Shanman一齊寫劇本。有傳發行權競爭非常激烈，7 間片廠及串流媒體參與競標，包括華納兄弟、環球影業、Amazon等等，睇嚟大家當佢係舊肥豬肉。

霸戲哥其實到呢刻都未分到《金剛戰神》同《百獸王》，記憶中兩套卡通都喺亞視播過，仲要係差唔多時段播，又係啲獅子組成機械人儆惡懲奸嘅故仔，搞到亂晒龍。有錯嘅，亞視之友唔該幫忙糾正。

細個最鍾意《百戰王》入面隻綠獅子，性格調皮似我，而每次佢哋合體，我都會跟住一齊跑，諗起都覺低B。當然佢首主題曲「衝~鋒~用百戰出戰~」我係會跟住唱。

問題係，《金剛戰神》係咪即係《百戰王》？等佢拍出嚟先算啦。