霸戲哥之日常#077 │ Bruce Willis

繼Sandra Bullock之後，又多一位荷里活巨星宣佈息影。點會估到係「不死身」Bruce Willis？

Bruce Willis嘅家人噚日發聲明，話Bruce經歷緊健康問題，最近被診斷患上失語症（Aphasia），將會影響佢認知嘅能力。經慎重考量，67歲嘅Bruce決定離開演藝事業。

消息傳出後，霸戲哥同豬視妹都愕咗然，因為早幾日前先講起佢。啱啱舉辦嘅金草莓獎（Golden Raspberry Awards），就拎Bruce嚟開玩笑，特登整咗個「Bruce Willis 2021年最爛演出獎」，戲謔佢拍咗多齣爛爆嘅B級片，結果《Cosmic Sin》跑出。Bruce唔同Nicolas Cage，唔似要撲水還恐龍骨嘅債，拍咁多爛片自毀形象，實在匪夷所思。依家諗番轉頭，可能Bruce都知道自己有病，所以想喺退出之前盡情享受拍戲都唔定。

Aphasia嘅主要成因係中風同腦部創傷，都有可能因為腦癌或腦部受感染而引起。由於主宰語言嘅腦區（Broca's area）受創，病人說話同讀寫能力都會受到影響。喺美國，大約100萬人先有一個患上失語症，Bruce可以話係非常不幸。

還好，Bruce有團結嘅家人做後盾（包括前妻Demi Moore），希望佢息影之後可以享受多啲家庭樂，展開人生另一階段。

霸戲哥

** 博客文章文責自負,不代表本公司立場 **

霸戲哥讀U嗰陣（二十幾年前）成日走堂，唔喺球場嘅話，就係流連VCD舖（正版）。記憶中，當時賣緊100蚊3隻，間中做特價100蚊4隻，但多數係啲舊片，又或者唔太受歡迎嘅戲。因為住Hall嘅關係，啲VCD買完返嚟周圍「pat」，傳吓傳吓，偶然會執到「荀嘢」，包括三仔……

我對美亞嘅認識，亦係由當時開始，一齣戲兩隻VCD，中間個隔成日爛，封面玻璃又花晒。不過美亞VCD係陪伴咗我好多個孤獨夜晚，而我咁鍾意電影，或多或少都同美亞有啲關係。

無啦啦講美亞，其實因為美亞娛樂最近聯同TVB推出YouTube頻道「8號電影院」，可以免費任睇超過500套港產片同79套TVB獨家製作嘅電視電影，好似豬視妹最愛嘅《行運一條龍》、《辣手神探》都有得睇，而4月1號晚有《算死草》添。

睇嚟我櫃筒底啲VCD可以拎去recycle啦。