博客文章
徐步高案件發生喺2006年，原來都已經16年前嘅事，但當日newsdesk嘅混亂同震撼，到依家仲記憶猶新。
呢單案嘅轟動程度，係霸戲哥前所未見，平時啲追尾故可能last三四日，徐步高案可以做足成個月頭版，仲要越刮越多料。不過，當年間間傳媒都玩「未審先判」，又用魔警嚟形容徐步高，令我見識到傳媒嘅可怕。
最記得亞視特登重播返徐步高生前參加《百萬富翁》嘅比賽片段谷收視，咁啱嗰集原來我hallmate有份玩，仲鬼鬼祟祟贏咗四萬蚊。呢件事通天之後，我哋成班豬朋狗友又多餐海鮮食。
隨住案件2007年於死因裁判法庭審判完，照理應該告一段落，但因為案件疑點重重，坊間亦流傳好多唔同嘅陰謀論，仲講到言之鑿鑿。
陸永主持嘅J2節目《逝者代言人》，今晚嗰集就會剖析徐步高槍擊案，仲會為觀眾破解世紀疑團。鍾意奇案或者陰謀論嘅你，今晚11點記得收睇。
霸戲哥
** 博客文章文責自負,不代表本公司立場 **
繼Sandra Bullock之後，又多一位荷里活巨星宣佈息影。點會估到係「不死身」Bruce Willis？
Bruce Willis嘅家人噚日發聲明，話Bruce經歷緊健康問題，最近被診斷患上失語症（Aphasia），將會影響佢認知嘅能力。經慎重考量，67歲嘅Bruce決定離開演藝事業。
消息傳出後，霸戲哥同豬視妹都愕咗然，因為早幾日前先講起佢。啱啱舉辦嘅金草莓獎（Golden Raspberry Awards），就拎Bruce嚟開玩笑，特登整咗個「Bruce Willis 2021年最爛演出獎」，戲謔佢拍咗多齣爛爆嘅B級片，結果《Cosmic Sin》跑出。Bruce唔同Nicolas Cage，唔似要撲水還恐龍骨嘅債，拍咁多爛片自毀形象，實在匪夷所思。依家諗番轉頭，可能Bruce都知道自己有病，所以想喺退出之前盡情享受拍戲都唔定。
Aphasia嘅主要成因係中風同腦部創傷，都有可能因為腦癌或腦部受感染而引起。由於主宰語言嘅腦區（Broca's area）受創，病人說話同讀寫能力都會受到影響。喺美國，大約100萬人先有一個患上失語症，Bruce可以話係非常不幸。
還好，Bruce有團結嘅家人做後盾（包括前妻Demi Moore），希望佢息影之後可以享受多啲家庭樂，展開人生另一階段。
