博客文章
一代女神孫藝珍結婚了，可惜新郎不是我。珍妹因拍攝《愛的迫降》同玄彬撻着，男才女貌，假如愛有天意，點睇佢哋先係天造地設嘅一對。
婚禮喺首爾華克山莊舉行，兩口子雖然話想低調搞，但成班韓星到賀見證童話故事happy ending，試問又點低調到。
認識珍妹係喺2002年，當時佢仲未拍《假如愛有天意》。佢同車太玄、李恩宙拍咗齣《向左愛向右愛》，珍妹飾演楚楚可憐嘅秀仁，清純到癲。嗰期啲韓國電影，齣齣玩生離死別，啲劇情例牌到不行，但你仍然會喊住睇。同後生呢輩講韓流就係咁開始，佢哋打死都唔會信。
睇到珍妹張婚紗相笑到咁甜，霸戲哥都覺得好安慰。珍妹，要幸福呀！
霸戲哥
** 博客文章文責自負,不代表本公司立場 **
繼Sandra Bullock之後，又多一位荷里活巨星宣佈息影。點會估到係「不死身」Bruce Willis？
Bruce Willis嘅家人噚日發聲明，話Bruce經歷緊健康問題，最近被診斷患上失語症（Aphasia），將會影響佢認知嘅能力。經慎重考量，67歲嘅Bruce決定離開演藝事業。
消息傳出後，霸戲哥同豬視妹都愕咗然，因為早幾日前先講起佢。啱啱舉辦嘅金草莓獎（Golden Raspberry Awards），就拎Bruce嚟開玩笑，特登整咗個「Bruce Willis 2021年最爛演出獎」，戲謔佢拍咗多齣爛爆嘅B級片，結果《Cosmic Sin》跑出。Bruce唔同Nicolas Cage，唔似要撲水還恐龍骨嘅債，拍咁多爛片自毀形象，實在匪夷所思。依家諗番轉頭，可能Bruce都知道自己有病，所以想喺退出之前盡情享受拍戲都唔定。
Aphasia嘅主要成因係中風同腦部創傷，都有可能因為腦癌或腦部受感染而引起。由於主宰語言嘅腦區（Broca's area）受創，病人說話同讀寫能力都會受到影響。喺美國，大約100萬人先有一個患上失語症，Bruce可以話係非常不幸。
還好，Bruce有團結嘅家人做後盾（包括前妻Demi Moore），希望佢息影之後可以享受多啲家庭樂，展開人生另一階段。
