博客文章
于洋上集教曉大家，飲珍珠奶茶時要小心，支飲管唔好亂咁插，唔係好易會gg（滴汗）。今晚呢集繼續由于洋、鄭子誠同曾展望嘅殯儀三爺孫showtime，死咗嘅于洋屍變，變成「詐屍」，識行識走之餘，仲會大小二便，咦好恐怖啫。睇見佢一枴一枴咁撼頭埋窗，豬視妹都咬牙齒切。
鄭子誠為咗贏層樓，故意隱暪老竇死訊，點都要等到另一業主白威死先，最後又真係畀佢等到。成功果然係需苦／父幹。當然，劇集要灌輸正確價值觀，多行不義必自斃，最後集體自燃死埋一齊，係佢哋種下嘅惡果。老實講，霸戲哥有少少同情鄭子誠，為咗層樓挺而走險，係幾多港人嘅悲哀寫照，何況隱暪死訊其實好似唔係好大罪啫？（算唔算非法處理屍體？）
講到屍體種類，殭屍、喪屍我哋聽得多，詐屍又係咩嚟？根據民間傳說，人死後留有一口活氣，如果畀動物靈魂附體，就會變成詐屍。所以亦有說，親人死後唔好畀動物走近。
詐屍可怕，但更可怕嘅永遠都係人心。
霸戲哥
** 博客文章文責自負,不代表本公司立場 **
今朝起身傳來噩耗，一代傳奇武打巨星「獨臂刀王」王羽今早於台北振興醫院逝世，享年80歲。其女兒王馨平喺社交平台證實消息。
王羽從影40多年，畢生拍攝超過80部電影。一出道已經憑邵氏電影《獨臂刀》（1967）走紅，之後幾年幾乎戲接戲冇停過。90年代開始淡出從商，所以年輕一輩或者未睇過佢嘅戲。
《獨臂刀》除咗捧紅王羽，亦令大導演張徹聲名鵲起，佢融合日本劍戟片風格，再加入個人元素，形成新派「暴力美學」，開創武俠片嘅風潮，係香港電影史好重要一環。而當年嘉禾有意拉攏王羽拍《獨臂刀大戰盲俠》，畀邵氏控告侵權要打官司，亦成為一時佳話。
2011年，王羽獲陳可辛邀請出山拍攝《武俠》，結果重拾戲癮，2013年更憑《失魂》奪得台北電影節最佳男主角。大家有機會可以睇吓。
戲入面飾演大俠，現實中王羽亦係一名鐵漢。2015年喺泰國機場中風暈倒，要緊急送院進行兩次開腦手術。走過鬼門關，王羽積極接受各種治療，包括高壓氧、針灸同推拿，絕對係令人敬佩嘅生命鬥士。
願獨臂刀王安息。
