霸戲哥之日常#097 │ 金宵手記叄：雙魚

「你真係信佢對個女咁好？」霸戲哥睇死@christineng 伍詠薇有啲嘢。
「唔信，因為佢係雙魚座。」豬視妹講到好似識星座性格分析咁。

霸戲哥唔信，純粹因為呢個世界太多呢類人，賤賣悲情，欺騙人嘅同情心圖利。呢類人慣性伎倆，就係不停喺自己傷口灑鹽，將自身缺陷完全暴露人前。而普遍人其實都係偽善，好容易會墮入圈套。至於好似我霸戲哥呢類絕對理性嘅人，多數都被標籤為不近人情，甚至係冷血無情。

不過，呢個世界就係咁。

今集《雙魚》係伍詠薇同@chloe_so 蘇皓兒嘅表演時間，講述蘇皓兒細個畀漒水潑親而毀容，伍詠薇不辭勞苦咁湊大個女，人前一副慈母樣。實情係，伍詠薇為咗令蘇皓兒繼續販賣悲情，唔准佢出街，唔准佢識男仔，處處控制住個女。隨住劇情推進，觀眾知道伍詠薇最叻其實係情緒勒索，軟硬兼施迫蘇皓兒就範。

值得一提係伍詠薇今集演技大爆發，尤其有一幕一秒變臉嗰個陰森樣，完全演活雙魚座嗰種雙面人嘅陰暗性格。

好想知伍詠薇屋企幅牆嘅圖案到底係乜。會唔會埋咗佢老公條屍喺入面？

霸戲哥

** 博客文章文責自負,不代表本公司立場 **

呢個月特別多「月」字戲，除咗Disney+上架嘅《月光騎士》同《月老》，呢緊4月21日上映（如果戲院重開）仲有套《月球隕落》，真係月鬧。

災難片《月球隕落》係「末日之父」Roland Emmerich執導，大家應該絕對唔會陌生，拍過《天煞地球反擊戰》、《明日之後》、《2012末日預言》，地球畀佢拍到越來越危險。今次講到月球撞埋地球添，而扮演救世主嘅就係Patrick Wilson同Halle Berry。唔好畀霸戲哥睇死，劇情九成九係NASA或者美國政府隱瞞事件，點知紙包唔住火，繼而爆發大災難，帶出人禍比天災更可怕。

睇外國評論，套戲評價麻麻，大家想學尖酸刻薄嘅英文，可以上去rotten tomatoes望下。咁多負評，霸戲哥反而更加想睇有幾爛，仲要喺大銀幕睇先夠震撼呀。