霸戲哥之日常#102 │ 生態頻道

風吹雞蛋殼，財散人安樂。霸戲哥呢頭先拎完政府派發嘅消費券，嗰頭就捧咗部50吋電視返屋企。敗家嚟講，我認第二，冇人敢認第一。

為咗畀個換電視嘅合理理由過豬視妹，我決定學電器舖嘅做法，就係播生態頻道嘅片，純粹showoff畫面嘅detail位。無心插柳下，我搵到@netflix Netflix有套上架冇耐嘅生態紀錄片《Animal》（海陸空動物王者），我十分之喜歡。

呢輯原來已經係第二季，一共四集，分別係猿、猛禽、熊同埋海豚科。成齣紀錄片都係喺covid時期拍攝，攝製深入國家公園日以繼夜監視啲動物，捕捉到好多平日見唔到嘅極珍貴畫面。或者只有全球大停擺之下，動物同大自然先有喘息嘅空間。

除左畫面震撼，編劇撰寫嘅旁白都係精心度過，令影像更有故事性同追看性。唔覺唔覺已經煲晒第二季。

霸戲哥大學主修ecology，但對大自然生態所知亦只係皮毛。我哋生而為人，如果能透過了解更多動物嘅本性，再反思一下我哋嘅行為，或多或少會有更多啟發。好彩嘅，甚至可以重拾返早已遺棄嘅信、望同愛。

呢部電視抵買啦。

霸戲哥

** 博客文章文責自負,不代表本公司立場 **

今時今日，如果唔識動畫《咒術迴戰》或《鬼滅之刃》，根本好難同後生仔溝通。為咗令自己感覺young啲，霸戲哥好努力煲咗幾集《咒術迴戰》。我發覺，依家啲動畫除咗講求畫質、故事、分鏡同剪接，就連節奏都非常講究，絕對唔容許《足球小將》咁，成集都未起腳射波嘅泵波鐘情況出現。

《咒術迴戰》嘅世界觀幾特別。話說人類嘅負面情緒累積後會形成咒靈，並會對人類造成傷害。只有「咒術師」可以利用咒力對抗呢啲咒靈。聽落係咪有啲似天師呢，只係咒術師打得型好多，又唔怪得後生仔女咁鍾意。

另外，動畫電影《劇場版 咒術迴戰 0》早排喺亞洲上映都勁收得，喺台灣一登場就打破今年開畫票房紀錄，票房佔率高達78%，都咪話唔犀利。至於香港呢，暫時安排5月19號上，但都要視乎疫情啦。

等唔切嘅你，逢星期四晚11點半可以去J2睇住動畫先，可以聽粵語配音。想原汁原味同一氣呵成嘅，依家Netflix都有得睇。