霸戲哥之日常#103 │ 金宵手記伍：儲存點

今個單元《城寨英雄GO!》來個大跳tone，講李君妍、伍禮騫同劉子碩喺金宵大廈網吧打機，無端端被吸入虛擬世界，韋家雄就為咗救囝囝劉頌鵬而入game，四人喺game度遇上林子善同吳家樂呢啲《城寨》角色。由於用咗唔少打機嘅jokes，冇玩開RPG或冇睇過《城寨英雄》嘅觀眾，有可能完全唔知呢集做乜。

霸戲哥反而幾欣賞編導呢個賭博性嘗試，喺惡搞同無稽嘅劇情入面，暗藏一啲幾發人深省嘅議題。四位入game嘅player，現實中都係喺社會被邊緣化嘅loser：李君妍係剩女（呢點好冇說服力）；伍禮騫啃老；劉子碩讀唔成書；韋家雄就係失敗嘅老竇。佢哋入到虛擬世界，表面上可暫忘現實嘅不濟，痛痛快快咁做英雄，但某程度上，一樣要憑自己努力，練功升級打大佬過關。

啲人成日話打機冇出色嘥時間，霸戲哥聽到都會冷笑幾聲。我以前玩過唔少RPG，喺遊戲身上領悟好多做人道理，包括學懂分辨善惡同對錯。

當然玩RPG有save point，行錯一步大可以load game重新嚟過，甚至棄game。但人生RPG係冇回頭路，做錯選擇隨時會觸發劇情，令你陷入萬劫不復嘅輪迴地獄。

霸戲哥

** 博客文章文責自負,不代表本公司立場 **

今時今日，如果唔識動畫《咒術迴戰》或《鬼滅之刃》，根本好難同後生仔溝通。為咗令自己感覺young啲，霸戲哥好努力煲咗幾集《咒術迴戰》。我發覺，依家啲動畫除咗講求畫質、故事、分鏡同剪接，就連節奏都非常講究，絕對唔容許《足球小將》咁，成集都未起腳射波嘅泵波鐘情況出現。

《咒術迴戰》嘅世界觀幾特別。話說人類嘅負面情緒累積後會形成咒靈，並會對人類造成傷害。只有「咒術師」可以利用咒力對抗呢啲咒靈。聽落係咪有啲似天師呢，只係咒術師打得型好多，又唔怪得後生仔女咁鍾意。

另外，動畫電影《劇場版 咒術迴戰 0》早排喺亞洲上映都勁收得，喺台灣一登場就打破今年開畫票房紀錄，票房佔率高達78%，都咪話唔犀利。至於香港呢，暫時安排5月19號上，但都要視乎疫情啦。

等唔切嘅你，逢星期四晚11點半可以去J2睇住動畫先，可以聽粵語配音。想原汁原味同一氣呵成嘅，依家Netflix都有得睇。