博客文章
Will Smith喺奧斯卡頒獎禮上護妻心切，在眾目睽睽之下怒冚Chris Rock一巴，美國影藝學會公佈處分：判處Will Smith不得參與奧斯卡頒獎禮及相關活動10年，即時生效，欽此。
Will Smith呢一巴，率先引發起第三次世界大戰，全世界人自動編成兩個陣營：撐佢同鬧爆佢。霸戲哥由始至終都覺得Will Smith冇錯，換轉豬視妹畀人笑甩頭髮，我都唔會顧慮後果，呢個先係男人真性情表現。至於有人話點都唔應該訴諸暴力，喂大佬，升巴啫，又唔係立把刀捅佢，樓下賣魚陳推排九出千畀豬肉黃打，又唔見你話下豬肉黃暴力？
不過最嘔心都係美國影藝學會嘅處理手法。明明呢件咁濕碎嘅事，可以低調處理，又或者以笑話帶過。但因為受到道德緊箍咒箍死，左膠DNA作祟，係都要喺全球面前建立道德榜樣，繼而引發出另一個更大嘅笑話。
暴力唔啱，但雙重標準同偽善更可恥。
霸戲哥
** 博客文章文責自負,不代表本公司立場 **
第五波疫情持續幾個月，近日終於有放緩跡象，一班抗疫疲勞嘅香港人，呢幾日四圍去消費同搵娛樂。周末唔想同人逼商場，霸戲哥倒有一個好去處推介，可以好chill之餘，仲保證啱晒鍾意電影嘅你。
由一班資深娛樂記者同攝記組成嘅「娛記正傳」，最近喺觀塘Master Room Cafe搞咗個名為《那些年的男主角》展覽，展出攝影師黃志明喺91-92年幫《電影雙周刊》做專訪時影低嘅珍藏。喺佢鏡頭下嘅男主角，周潤發、張國榮、梁朝偉、黎明、黃秋生、郭富城、梁家輝、張學友同吳宇森，位位份量都嚇死你。
呢班巨星見證住八、九十年代香港電影業最輝煌嘅時代，而每張相嘅背後，除咗記載住獨一無二嘅故事之外，亦保留咗前殖民地時代嗰種百花齊放嘅芳香。
就趁呢個周末，呼吸一下似曾相識嘅空氣吧。
娛記正傳 - 那些年的男主角
日期：即日起 - 2022年6月30日
地點：Master Room Cafe 觀塘偉業街223號宏利金融中心地下G02舖
