博客文章
第五波疫情持續幾個月，近日終於有放緩跡象，一班抗疫疲勞嘅香港人，呢幾日四圍去消費同搵娛樂。周末唔想同人逼商場，霸戲哥倒有一個好去處推介，可以好chill之餘，仲保證啱晒鍾意電影嘅你。
由一班資深娛樂記者同攝記組成嘅「娛記正傳」，最近喺觀塘Master Room Cafe搞咗個名為《那些年的男主角》展覽，展出攝影師黃志明喺91-92年幫《電影雙周刊》做專訪時影低嘅珍藏。喺佢鏡頭下嘅男主角，周潤發、張國榮、梁朝偉、黎明、黃秋生、郭富城、梁家輝、張學友同吳宇森，位位份量都嚇死你。
呢班巨星見證住八、九十年代香港電影業最輝煌嘅時代，而每張相嘅背後，除咗記載住獨一無二嘅故事之外，亦保留咗前殖民地時代嗰種百花齊放嘅芳香。
就趁呢個周末，呼吸一下似曾相識嘅空氣吧。
娛記正傳 - 那些年的男主角
日期：即日起 - 2022年6月30日
地點：Master Room Cafe 觀塘偉業街223號宏利金融中心地下G02舖
霸戲哥
** 博客文章文責自負,不代表本公司立場 **
今個單元《城寨英雄GO!》來個大跳tone，講李君妍、伍禮騫同劉子碩喺金宵大廈網吧打機，無端端被吸入虛擬世界，韋家雄就為咗救囝囝劉頌鵬而入game，四人喺game度遇上林子善同吳家樂呢啲《城寨》角色。由於用咗唔少打機嘅jokes，冇玩開RPG或冇睇過《城寨英雄》嘅觀眾，有可能完全唔知呢集做乜。
霸戲哥反而幾欣賞編導呢個賭博性嘗試，喺惡搞同無稽嘅劇情入面，暗藏一啲幾發人深省嘅議題。四位入game嘅player，現實中都係喺社會被邊緣化嘅loser：李君妍係剩女（呢點好冇說服力）；伍禮騫啃老；劉子碩讀唔成書；韋家雄就係失敗嘅老竇。佢哋入到虛擬世界，表面上可暫忘現實嘅不濟，痛痛快快咁做英雄，但某程度上，一樣要憑自己努力，練功升級打大佬過關。
啲人成日話打機冇出色嘥時間，霸戲哥聽到都會冷笑幾聲。我以前玩過唔少RPG，喺遊戲身上領悟好多做人道理，包括學懂分辨善惡同對錯。
當然玩RPG有save point，行錯一步大可以load game重新嚟過，甚至棄game。但人生RPG係冇回頭路，做錯選擇隨時會觸發劇情，令你陷入萬劫不復嘅輪迴地獄。
