博客文章
疫情持續下百業蕭條，人人都勒住荷包唔使錢，但求填飽個肚餓唔死就算。結果令被譽為窮人恩物嘅「兩餸飯」舖頭開到成行成市，成為逆市奇葩。聽聞油麻地有檔兩餸飯舖長期排長龍，龍尾排到去街口。
兩餸飯係夠經濟，但自己煮其實咪仲慳。@tvbcomhk TVB聽晚推出全新飲食節目《三餸一湯》，由三姐蕭秀香搭住御用女傭@lesleychianglove 姜麗文主持，逢星期一至星期三晚上10點半喺翡翠台播出。
第一集三姐會教大家煮「不敗番茄炒滑蛋」、「香煎排骨蒸福袋銀針粉」同「港式煲仔魚飯」，而Lesley就會分享廚房小秘技，包括剩菜大翻身、十分鐘煮好懶人和味飯同疫下強身健體餐等等。
自命天才小廚師嘅豬視妹，已經講明要我睇，迫我學番幾招旁身喎。
霸戲哥
** 博客文章文責自負,不代表本公司立場 **
今個單元《城寨英雄GO!》來個大跳tone，講李君妍、伍禮騫同劉子碩喺金宵大廈網吧打機，無端端被吸入虛擬世界，韋家雄就為咗救囝囝劉頌鵬而入game，四人喺game度遇上林子善同吳家樂呢啲《城寨》角色。由於用咗唔少打機嘅jokes，冇玩開RPG或冇睇過《城寨英雄》嘅觀眾，有可能完全唔知呢集做乜。
霸戲哥反而幾欣賞編導呢個賭博性嘗試，喺惡搞同無稽嘅劇情入面，暗藏一啲幾發人深省嘅議題。四位入game嘅player，現實中都係喺社會被邊緣化嘅loser：李君妍係剩女（呢點好冇說服力）；伍禮騫啃老；劉子碩讀唔成書；韋家雄就係失敗嘅老竇。佢哋入到虛擬世界，表面上可暫忘現實嘅不濟，痛痛快快咁做英雄，但某程度上，一樣要憑自己努力，練功升級打大佬過關。
啲人成日話打機冇出色嘥時間，霸戲哥聽到都會冷笑幾聲。我以前玩過唔少RPG，喺遊戲身上領悟好多做人道理，包括學懂分辨善惡同對錯。
當然玩RPG有save point，行錯一步大可以load game重新嚟過，甚至棄game。但人生RPG係冇回頭路，做錯選擇隨時會觸發劇情，令你陷入萬劫不復嘅輪迴地獄。
