霸戲哥之日常#109 │ 恐怖片

2011年，前BBC主持Jimmy Savile逝世，死時84歲。其時全英國覆蓋住悲傷，集體哀悼呢位大慈善家同埋小朋友嘅偶像。佢主持嘅《Jim’ll fix it》二十年來幫過幾多小朋友實現夢想，係「我都做得到」嘅威力加強版。佢有辦法帶你參觀唐寧街十號，甚至同戴卓爾夫人見面。Jimmy字典冇「唔得」呢兩個字。

直至Jimmy死後差唔多一年，先至畀人揭發原來佢係世紀變態佬，喺1955年至2009年間，犯下無數性侵同虐待案件但逍遙法外，受害者由5歲到75歲都有。

但點解會冇人發現？

啱啱喺Netflix上架嘅紀錄片《Jimmy Savile》，某程度上係一齣恐怖片，佢會剝皮拆骨咁，逐寸撕開Jimmy嘅羊皮，露出豺狼嘅真面目。你會發現好好先生嘅背後，竟然係咁駭人、心寒同嘔心。呢啲真人真事，係驚慄大師Stephen King都撰寫唔到。

「吓？死咗先揭發？咁咪賺晒？」豬視妹一時氣憤難平。但我唔認同。我認為遺臭萬年先係最大嘅報應。

我深信因果必報，只係時晨未到。

霸戲哥

** 博客文章文責自負,不代表本公司立場 **

疫情持續下百業蕭條，人人都勒住荷包唔使錢，但求填飽個肚餓唔死就算。結果令被譽為窮人恩物嘅「兩餸飯」舖頭開到成行成市，成為逆市奇葩。聽聞油麻地有檔兩餸飯舖長期排長龍，龍尾排到去街口。

兩餸飯係夠經濟，但自己煮其實咪仲慳。@tvbcomhk TVB聽晚推出全新飲食節目《三餸一湯》，由三姐蕭秀香搭住御用女傭@lesleychianglove 姜麗文主持，逢星期一至星期三晚上10點半喺翡翠台播出。

第一集三姐會教大家煮「不敗番茄炒滑蛋」、「香煎排骨蒸福袋銀針粉」同「港式煲仔魚飯」，而Lesley就會分享廚房小秘技，包括剩菜大翻身、十分鐘煮好懶人和味飯同疫下強身健體餐等等。

自命天才小廚師嘅豬視妹，已經講明要我睇，迫我學番幾招旁身喎。