霸戲哥之日常#108 │ 英超大戰

今晚霸戲哥乜都唔做，淨係會睇英超冠軍前哨戰——曼城主戰對利物浦，喺夜晚11點半開波。

呢幾年英超都係曼城同利物浦兩隊鬥，但記得上年曼城未到季尾已拉開一截，提早封王搞到冇晒隱。今年就好好多，有返啲鬥餐死嘅看頭。暫時兩隊未計呢場仲有八場波要踢，曼城喺積分榜暫時領先利物浦一分，所以呢場「六分波」將會係關鍵。

雖然兩支球隊都唔係霸戲哥favorite，但有時都忍唔住要讚利物浦領隊高普，經佢嘅帶領下，將一支近年經常被訕笑嘅球隊，改做成歐洲冠軍，估計高普除咗識教波，仲係優秀嘅領導者，佢嘅激情可以感染身邊人為佢賣命，同令自己變得更強。

我有少少希望利物浦贏，曼城班球員太機械化，太似《少林足球》嘅魔鬼隊啦。

霸戲哥

** 博客文章文責自負,不代表本公司立場 **

疫情持續下百業蕭條，人人都勒住荷包唔使錢，但求填飽個肚餓唔死就算。結果令被譽為窮人恩物嘅「兩餸飯」舖頭開到成行成市，成為逆市奇葩。聽聞油麻地有檔兩餸飯舖長期排長龍，龍尾排到去街口。

兩餸飯係夠經濟，但自己煮其實咪仲慳。@tvbcomhk TVB聽晚推出全新飲食節目《三餸一湯》，由三姐蕭秀香搭住御用女傭@lesleychianglove 姜麗文主持，逢星期一至星期三晚上10點半喺翡翠台播出。

第一集三姐會教大家煮「不敗番茄炒滑蛋」、「香煎排骨蒸福袋銀針粉」同「港式煲仔魚飯」，而Lesley就會分享廚房小秘技，包括剩菜大翻身、十分鐘煮好懶人和味飯同疫下強身健體餐等等。

自命天才小廚師嘅豬視妹，已經講明要我睇，迫我學番幾招旁身喎。