霸戲哥之日常#112 │ 金宵手記陸：成就？

霸戲哥就知《城寨英雄GO！》呢個單元唔簡單，打RPG只不過係幌子，其實編導想帶出「唔一定有希望先要堅持，係要堅持先有希望」呢個道理。加上韋家雄同 林子善演嘅親情戲非常到位，好難唔感動。

上集講到韋家雄要搵迷失喺game入面嘅囝囝，大家都估到NPC林子善就係佢要搵嘅天堂。但原來天堂之所以沉迷打機，係因為佢患上ALS，情況只會越嚟越差，對人生已經冇晒希望，反而喺遊戲世界，仲搵到佢嘅夢想同成就。作為爸爸嘅韋家雄，始終唔明囝囝諗乜，以為佢放棄緊自己。好典型嘅世代矛盾。直至佢自己入埋game，先知明白天堂嘅理念。

呢度存在一個幾深奧嘅問題，究竟點先為之精采人生？係咪一定要跟住長輩一套走，事業有成養妻活兒先算精采？咁如果好似天堂咁患上不治之症，睇唔到前景，但喺虛擬世界可以贏番自尊同榮耀，又算唔算係一種成就？

挪威就有一個case，有個細路Mats Steen患上名為Duchenne muscular dystrophy嘅罕見疾病，全身肌肉萎縮，行唔到路，醫生批佢活唔到20歲。結果Mats Steen將畢生時間花喺《魔獸世界》，喺遊戲世界入面受到萬人敬仰，來自世界各地嘅網友都有出席佢嘅喪禮，成功名留青史。

現實永遠都係無敵嘅final boss，佢唔會跟劇本走，亦可任意修改程式，無預警咁摧毀你所擁有嘅一切。唯一可以做，我諗就係喺心態上，要有林子善同韋家雄嘅覺悟。

霸戲哥

** 博客文章文責自負,不代表本公司立場 **

豬視妹捧曼聯。我唔敢話佢係勝利球迷，至少曼聯依家踢成咁，佢都仲盲撐。當然，佢睇波年代係曼聯王朝，碧咸、舒米高、傑斯、史高斯同黑雙煞個個獨當一面，背後全賴總舵手：The Boss費格遜。

我對費爵爺嘅認識唔算深，只知佢係一個above average嘅足球員、一個惡死能登嘅領隊、令對手聞風喪膽嘅「費格遜時間」(Fergie Time)、同埋佢嘅傳統陣式4-4-2-4（連球證旁證）。

呢日陪豬視妹睇咗齣紀錄片《費格遜永不言敗》，令我加深對費格遜嘅認識，同明白佢點解咁受人尊重。

紀錄片係由費格遜個仔Jason親自執導，由費格遜嘅成長背景同球員生涯講起，講佢點樣少不更事、酗酒同打交畀人拉，仲差啲放棄埋足球。佢嘅教鞭生涯都唔係一帆風順，教曼聯頭幾年畀球迷噓爆，仲叫佢滾返去蘇格蘭⋯⋯

有啲人遇到失敗會一蹶不振，但費格遜每一次嘅失敗，都成為鞭策自己嘅原料，令佢邁向成功。

霸戲哥以前成日覺得費格遜好運啫，有班咁好嘅球員，依家諗番轉頭，反而覺得班球員死好命，遇到一個可以改變自己一生嘅Boss。

人生有個好boss，夫復可求？