博客文章
百笑成材又一例證！紐約電影電視節（New York Festivals TV & Film Awards）最近公佈提名，@BOSCOMINE 黃宗澤憑電視劇《非凡三俠》獲提名「最佳男主角」，同其餘四位嚟自新加坡同巴西嘅演員競逐殊榮。
呢件事又令我諗番起以前有個「金話梅頒獎禮」，就係專為鞭策電影人而設嘅獎，黃宗澤初初出道時演技麻麻，成人畀高登仔笑，曾經憑《大四喜》硬吞金話梅。係咪即刻好想拎返隻VCD出嚟睇呢！
正所謂心態決定高度，有人會覺得呢啲獎係羞辱，又有人當成鞭策，自恥近乎勇。Bosco肯定屬於後者。
睇番當年TVB力捧嘅「奧運六星」：Bosco、林峯、吳卓羲、陳鍵鋒、馬國明同黎諾懿，Bosco嘅演技應該係最唔被睇好嗰個，但事實證明，好多嘢都係後發先至，而Bosco早喺2014年，已經憑《男人唔可以窮》捧走《歐洲萬像國際華語電影節》「最佳男主角」。
在此預祝Bosco再奪殊榮。
霸戲哥
** 博客文章文責自負,不代表本公司立場 **
霸戲哥就知《城寨英雄GO！》呢個單元唔簡單，打RPG只不過係幌子，其實編導想帶出「唔一定有希望先要堅持，係要堅持先有希望」呢個道理。加上韋家雄同 林子善演嘅親情戲非常到位，好難唔感動。
上集講到韋家雄要搵迷失喺game入面嘅囝囝，大家都估到NPC林子善就係佢要搵嘅天堂。但原來天堂之所以沉迷打機，係因為佢患上ALS，情況只會越嚟越差，對人生已經冇晒希望，反而喺遊戲世界，仲搵到佢嘅夢想同成就。作為爸爸嘅韋家雄，始終唔明囝囝諗乜，以為佢放棄緊自己。好典型嘅世代矛盾。直至佢自己入埋game，先知明白天堂嘅理念。
呢度存在一個幾深奧嘅問題，究竟點先為之精采人生？係咪一定要跟住長輩一套走，事業有成養妻活兒先算精采？咁如果好似天堂咁患上不治之症，睇唔到前景，但喺虛擬世界可以贏番自尊同榮耀，又算唔算係一種成就？
挪威就有一個case，有個細路Mats Steen患上名為Duchenne muscular dystrophy嘅罕見疾病，全身肌肉萎縮，行唔到路，醫生批佢活唔到20歲。結果Mats Steen將畢生時間花喺《魔獸世界》，喺遊戲世界入面受到萬人敬仰，來自世界各地嘅網友都有出席佢嘅喪禮，成功名留青史。
現實永遠都係無敵嘅final boss，佢唔會跟劇本走，亦可任意修改程式，無預警咁摧毀你所擁有嘅一切。唯一可以做，我諗就係喺心態上，要有林子善同韋家雄嘅覺悟。
