霸戲哥之日常#118 │ 金宵手記捌：心魔

霸戲哥諗多咗，奪舍最終都冇出現。諗番轉頭，《姐姐》呢個單元從未出現過靈異嘢，嗰啲鬼胎呀、血祭呀、降頭呀、洋娃娃公仔咁，全部都係掩眼法。最詭異嘅，由始至終都係人嘅心魔。

今集揭曉樊亦敏個失蹤囡囡係死於交通意外，佢同黃子雄念女成狂，用心靈操控
@franchesca_wong 黃婉華，將佢改造成自己個女一模一樣。作為旁觀者，梗係覺得變態，但如果企喺父母角度，又好自然會同情佢哋。

上集黃婉華搽到黑炆炆扮姐姐，引起唔少爭議，話TVB歧視外傭。霸戲哥覺得有少少冤枉，黃婉華膚色由黑變白，由唔識廣東話變成勒勒聲，主要係交代佢嘅改造經過，絕對係劇情需要。

樊亦敏同黃子雄嘅可怕，極其量係扭曲嘅愛。最可怕嘅，我認為係被物質操控嘅黃婉華，迷失到連出賣咗自己靈魂都唔知。利慾當前，真我真係咁重要咩？

霸戲哥有個老死，曾以為道不同都可以做到摯友。好可惜，佢同結尾嘅黃婉華一樣，始終走唔出嗰塊真實之鏡，選擇繼續畀人操控。諗起都真係欷歔。

霸戲哥

** 博客文章文責自負,不代表本公司立場 **

黃子華、鄧麗欣、王菀之、張繼聰、林明禎同陳湛文主演嘅電影《飯戲攻心》，因為第五波疫情關係，由原本新年食團年飯，變咗改喺中秋食團圓飯。不過最重要都係有飯開，咁先有戲力同動力繼續博殺。

正如導演陳詠燊話齋，每部戲都有自己嘅命，食唔到賀歲檔，但造就套戲入圍意大利烏甸尼遠東電影節嘅競賽單元，同時獲提名競逐The Mulberry Award最佳劇本獎，都算係有番啲安慰。

同樣有份競逐The Mulberry Award最佳劇本獎嘅，仲有另一齣港片，都係由鄧麗欣主演嘅《12日》。套戲係《12夜》嘅延續（原來已經22年前），亦係由林愛華執導同編劇。

至於喺地球嘅另一邊，又有另一齣港片揚威。彭秀慧執導，毛姐毛舜筠、姜濤同阿Jer柳應廷主演嘅《阿媽有咗第二個》，啱啱喺芝加哥亞洲躍動電影節贏咗個「觀眾票選獎」（Audience Choice Award），真係可喜可賀呀。

第五波疫情見岸，唔止有市民嘅報復式出遊，仲有港片嘅報復式揚威呢。