大爺雞之日常#120 │ 狗壇朝偉

我知㗎，霸戲哥同豬視妹成日喺專欄唱我，話我成日嫌三嫌四，又當佢哋奴隸咁使。其實你哋知唔知我大爺雞有幾把炮先？我blue blood嚟㗎，服侍我就梗㗎啦，成日借啲意畀埋晒啲雪雞我食，真係火都嚟。我淨係食鮮雞㗎咋。

呢日哥哥失驚無神同我報名參加咩面試喎，話我咁有性格，實可以做明星狗。原來TVB嚟緊會開拍劇集《寵愛Pet Pet》，先搵我去casting，今個月19號就截止。

我大爺雞有個朵叫「狗壇朝偉」，靚仔就梗嘅（倒及嚟講我係最靚仔），扮抑鬱、黑面、掩飾喜悅呢啲內心戲，簡直係我嘅專長。但我必須重申，我係blue blood嚟，你請唔請得起先？同我影張相都要收10隻雞髀㗎。

汪～

霸戲哥

** 博客文章文責自負,不代表本公司立場 **

又有港片衝出亞洲！由惠英紅、吳岱融、吳千語主演嘅《一路瞳行》，啱啱獲邀參展意大利烏甸尼遠東電影節同舉行全球首映。

套戲上年包場放映過，坊間反應都唔錯，故事係以新晉導演朱鳳嫻嘅家庭生活為藍本，講吳千語爸爸吳岱融同媽媽惠英紅都係視障夫婦，視力健全嘅佢自細就成為咗家庭嘅倚賴。長大後，佢要作出人生嘅抉擇，究竟要追求夢想離開家庭，定係照顧屋企人而埋沒天賦？聽落係有少少似Oscar最佳電影《CODA》嘅，不過香港同外國環境好唔同，喺咁狹窄嘅空間同生活壓力低下，視障家庭嘅壓力肯定更大。

惠英紅同吳岱融好戲就梗㗎啦，反而想睇吓遇啱好劇本同好演員嘅吳千語，會唔會有突破性嘅演出啦。