博客文章
又有港片衝出亞洲！由惠英紅、吳岱融、吳千語主演嘅《一路瞳行》，啱啱獲邀參展意大利烏甸尼遠東電影節同舉行全球首映。
套戲上年包場放映過，坊間反應都唔錯，故事係以新晉導演朱鳳嫻嘅家庭生活為藍本，講吳千語爸爸吳岱融同媽媽惠英紅都係視障夫婦，視力健全嘅佢自細就成為咗家庭嘅倚賴。長大後，佢要作出人生嘅抉擇，究竟要追求夢想離開家庭，定係照顧屋企人而埋沒天賦？聽落係有少少似Oscar最佳電影《CODA》嘅，不過香港同外國環境好唔同，喺咁狹窄嘅空間同生活壓力低下，視障家庭嘅壓力肯定更大。
惠英紅同吳岱融好戲就梗㗎啦，反而想睇吓遇啱好劇本同好演員嘅吳千語，會唔會有突破性嘅演出啦。
霸戲哥
** 博客文章文責自負,不代表本公司立場 **
霸戲哥諗多咗，奪舍最終都冇出現。諗番轉頭，《姐姐》呢個單元從未出現過靈異嘢，嗰啲鬼胎呀、血祭呀、降頭呀、洋娃娃公仔咁，全部都係掩眼法。最詭異嘅，由始至終都係人嘅心魔。
今集揭曉樊亦敏個失蹤囡囡係死於交通意外，佢同黃子雄念女成狂，用心靈操控
@franchesca_wong 黃婉華，將佢改造成自己個女一模一樣。作為旁觀者，梗係覺得變態，但如果企喺父母角度，又好自然會同情佢哋。
上集黃婉華搽到黑炆炆扮姐姐，引起唔少爭議，話TVB歧視外傭。霸戲哥覺得有少少冤枉，黃婉華膚色由黑變白，由唔識廣東話變成勒勒聲，主要係交代佢嘅改造經過，絕對係劇情需要。
樊亦敏同黃子雄嘅可怕，極其量係扭曲嘅愛。最可怕嘅，我認為係被物質操控嘅黃婉華，迷失到連出賣咗自己靈魂都唔知。利慾當前，真我真係咁重要咩？
霸戲哥有個老死，曾以為道不同都可以做到摯友。好可惜，佢同結尾嘅黃婉華一樣，始終走唔出嗰塊真實之鏡，選擇繼續畀人操控。諗起都真係欷歔。
