博客文章
人生充滿咗挫折同失敗，亦有行差踏錯嘅時候。霸戲哥細個流連球場，曾經有半隻腳踩咗入黑社會，好彩讀中學時遇到個PE阿Sir，將我拉返入正途。好一個《驕陽似我》嘅故事。
呢位PE阿Sir，除咗分享自己嘅人生經歷，仲好鼓勵我去睇當時好hit嘅書：《心靈雞湯》。係咁娘㗎啦，但又真係work。
隨住科技進步，《心靈雞湯》已經慢慢演變成真人talkshow，喺外國非常流行。而直至噚晚，香港終於都有呢類型節目。
由正義之Bob@bob_lamshingbun 林盛斌主持嘅TVB節目《360 秒人生課堂》，噚晚開始逢禮拜四、禮拜五晚10點半喺翡翠台播出。每集邀請嘉賓用360秒時間分享一個人生經歷，總有一個感動同啟發到你。
人生喺最困難嘅時候，有時候未必一定要正能量，反而係一個扭轉命運嘅啟發。
霸戲哥
** 博客文章文責自負,不代表本公司立場 **
幸福唔係必然，呢個世界有好多狗狗冇大爺雞咁好彩，一投胎出世就做主人，餐餐準時有雞有魚有飯飯。
單係喺香港，流浪狗嘅總數就以萬計，當狗狗唔小心踩入社區，好容易畀人舉報，然後由漁護署埋單（四日內冇主人認領，署方可將其人道毁滅）。咁多年嚟，流浪狗問題一直被人忽視。好彩，呢個世界都有好多有愛心嘅人同組織，發起拯救流浪狗行動，@paws_grs 「毛守救援」就係其中之一。
為咗令更多人關注組織嘅活動，佢哋最近拍咗條《天天》嘅短片，愛狗之人鍾舒漫仲義演一角，短片今日會放上YouTube。《天天》根據真實故事改編，講述流浪狗「天天」不時喺天台出現，成日整到啲天線，搞到鍾舒漫冇電視睇。有日鍾舒漫忍無可忍，強行捕捉天天，最後釀成慘劇。
霸戲哥知道好多呢啲愛狗組織，係好辛苦經營同極之吃力不討好，最慣常聽到就係畀人話佢哋呃善款。而事實上，佢哋每拯救一隻流狼狗，就要花好多經費喺佢哋身上。
呢篇文係大爺雞叫我打嘅，佢都好希望多啲人關注流浪狗嘅組織。All lives matter呀。
