霸戲哥之日常#127 │ 搵命博

災難片長拍長有， 各式各樣嘅天災，好似地震、海嘯、火山爆發、龍捲風、雪崩、甚至隕石撞地球統統都拍過晒，但點解咁多導演依然樂此不疲繼續拍？因為呢類戲，對外可以展示軟勢力，對內就可以加強同鞏固國民嘅民族意識，國家點會唔支持？

搜救電影係災難片嘅變奏版，嚟緊將會有套由@donnieyenofficial 甄子丹主演嘅《搜救》準備上映。套戲講丹爺因為自己嘅疏忽，令阿仔喺冰天雪地度走失，極度自責嘅丹爺，於是唔顧自身危險，聯同搜救隊一齊拯救囝囝。

要展示中國搜救隊有幾專業，演員當然都唔可以揸流灘。但丹爺直情搵命博，喺攝氏零下30幾度天氣下，跳入河流拍攝，不愧為宇宙最強。

《搜救》預告片
https://www.youtube.com/watch?v=qIkhZpoZw7c

霸戲哥

** 博客文章文責自負,不代表本公司立場 **

就快5月，第75屆康城影展啱啱公佈入圍競逐最高榮譽金棕櫚獎嘅18部電影候選名單，可惜嘅係冇華語電影入圍，而康城常客、韓國導演朴贊郁，就憑《分手的決心》入圍，而套戲女主角就係湯唯，即係話佢有份爭康城影后。

《分手的決心》講述朴海日扮演嘅刑警，喺調查一宗神秘死亡案件，遇到死者嘅妻子湯唯，兩人逐漸產生複雜嘅情感。睇嚟又係朴贊郁最拿手嘅懸疑、愛情加復仇嘅戲碼。

湯唯近年深得韓國人歡心，10年佢同玄彬合演《晚秋》，一場吻戲迷倒韓國影迷之餘，亦為佢捧走多個韓國電影獎項。當然，佢亦因為呢套戲而認識咗導演，即現任老公金泰勇。

湯唯演技精湛就毋庸置疑嘅，唔知佢喺朴贊郁嘅調教下，有冇機會登上康城影后寶座呢，5月17號自有分曉。