博客文章
大陸劇《機智女法醫》播完，又輪到另一齣本土劇《食腦喪B》緊接TVB翡翠台嘅八點半時段。由「食腦三子」何廣沛、郭子豪、方紹聰，搭住江嘉敏、陳曉華同朱智賢主演，有幾「食腦」同有幾「喪」，聽晚自有分曉。
自從韓國電影《屍殺列車》上映之後，喪屍片幾乎冇停過，好似《殭屍校園》、《ALIVE》、《屍戰朝鮮》、《Happiness》，就嚟可以整個喪屍元宇宙。
至於TVB呢套《食腦喪B》，就係以喪屍片掛帥嘅小品愛情片，故事講何廣沛以為自己畀澳洲毒蜘蛛咬傷而變成喪屍，其實體內存有喪屍基因。自此，佢就時不時食人腦，食完會擁有對方嘅記憶同技能。何廣沛之後會同江嘉敏、陳曉華譜出一段搞笑又離奇嘅戀愛故事。
唔知《食腦喪B》又會唔會掀起新一輪嘅喪屍熱潮呢？
霸戲哥
** 博客文章文責自負,不代表本公司立場 **
之前霸戲哥介紹過嘅《第六屆香港兒童國際電影節》（《The 6th Hong Kong Kids International Film Festival》），唔經唔覺已經嚟到尾聲。閉幕電影《留聲》呢兩日喺官方網頁免費有得睇，今朝終於有時間睇咗，感受都幾深。
《留聲》故事好簡單，主角光仔（黃梓樂）讀緊小五，因為嫲嫲離世而情緒低落，成績一落千丈，又同細妹嗌交。阿媽蔣祖曼同阿爸陳宇琛以為囝囝心散同曳曳，一日到黑淨係識得鬧，冇嘗試去真正理解囝囝嘅感受。
香港生活壓力大，好多父母平日要返工，就賴低啲仔女畀工人姐姐照顧，放工返嚟又冇時間去湊。久而久之就會產生惰性，畀藉口自己話冇時間去湊。就好似戲入面嘅蔣祖曼同陳宇琛咁。所以成日話，生仔要考牌，如果身為父母顧唔掂啲仔女，真係唔生好過。
雖然呢個係兒童電影節，但《留聲》似乎畀大人睇啱啲。喺身邊嘅小孩，不妨畀啲指引你嘅家長，教佢哋點樣做一個有責任嘅老竇老母。
