霸戲哥之日常#129 │ 兒童指引

之前霸戲哥介紹過嘅《第六屆香港兒童國際電影節》（《The 6th Hong Kong Kids International Film Festival》），唔經唔覺已經嚟到尾聲。閉幕電影《留聲》呢兩日喺官方網頁免費有得睇，今朝終於有時間睇咗，感受都幾深。

《留聲》故事好簡單，主角光仔（黃梓樂）讀緊小五，因為嫲嫲離世而情緒低落，成績一落千丈，又同細妹嗌交。阿媽蔣祖曼同阿爸陳宇琛以為囝囝心散同曳曳，一日到黑淨係識得鬧，冇嘗試去真正理解囝囝嘅感受。

香港生活壓力大，好多父母平日要返工，就賴低啲仔女畀工人姐姐照顧，放工返嚟又冇時間去湊。久而久之就會產生惰性，畀藉口自己話冇時間去湊。就好似戲入面嘅蔣祖曼同陳宇琛咁。所以成日話，生仔要考牌，如果身為父母顧唔掂啲仔女，真係唔生好過。

雖然呢個係兒童電影節，但《留聲》似乎畀大人睇啱啲。喺身邊嘅小孩，不妨畀啲指引你嘅家長，教佢哋點樣做一個有責任嘅老竇老母。

霸戲哥

** 博客文章文責自負,不代表本公司立場 **

之前謠傳同無綫高層鬧不和嘅「首席創意官」王祖藍，原來密密籌備無綫同湖南衛視芒果TV合辦嘅重頭音樂節目《聲生不息》，佢將會同何炅一齊做主持，而參賽嘅中港兩地歌手名單亦啱啱晒冷，分別有林子祥、葉蒨文、李克勤、楊千嬅、李健、林曉峰、李玟、周筆暢、 毛不易、劉惜君、馬賽克、炎明熹、曾比特、安崎、單依純同魔動閃霸。

《聲生不息》噚日亦發表咗宣傳海報，顏色以黑白灰嘅暗色調為主，相信係想表達對粵語歌曲嘅致敬。不過老實講，霸戲哥對呢隻色調就唔太欣賞，硬係覺得太過死氣沉沉，同生生不息嘅主題有啲格格不入。

不過宣傳海報好死啫，講到尾，最緊要都係節目要好睇。4月24號第一集，即管拭目以待吧。