博客文章
之前謠傳同無綫高層鬧不和嘅「首席創意官」王祖藍，原來密密籌備無綫同湖南衛視芒果TV合辦嘅重頭音樂節目《聲生不息》，佢將會同何炅一齊做主持，而參賽嘅中港兩地歌手名單亦啱啱晒冷，分別有林子祥、葉蒨文、李克勤、楊千嬅、李健、林曉峰、李玟、周筆暢、 毛不易、劉惜君、馬賽克、炎明熹、曾比特、安崎、單依純同魔動閃霸。
《聲生不息》噚日亦發表咗宣傳海報，顏色以黑白灰嘅暗色調為主，相信係想表達對粵語歌曲嘅致敬。不過老實講，霸戲哥對呢隻色調就唔太欣賞，硬係覺得太過死氣沉沉，同生生不息嘅主題有啲格格不入。
不過宣傳海報好死啫，講到尾，最緊要都係節目要好睇。4月24號第一集，即管拭目以待吧。
霸戲哥
** 博客文章文責自負,不代表本公司立場 **
災難片長拍長有， 各式各樣嘅天災，好似地震、海嘯、火山爆發、龍捲風、雪崩、甚至隕石撞地球統統都拍過晒，但點解咁多導演依然樂此不疲繼續拍？因為呢類戲，對外可以展示軟勢力，對內就可以加強同鞏固國民嘅民族意識，國家點會唔支持？
搜救電影係災難片嘅變奏版，嚟緊將會有套由@donnieyenofficial 甄子丹主演嘅《搜救》準備上映。套戲講丹爺因為自己嘅疏忽，令阿仔喺冰天雪地度走失，極度自責嘅丹爺，於是唔顧自身危險，聯同搜救隊一齊拯救囝囝。
要展示中國搜救隊有幾專業，演員當然都唔可以揸流灘。但丹爺直情搵命博，喺攝氏零下30幾度天氣下，跳入河流拍攝，不愧為宇宙最強。
《搜救》預告片
https://www.youtube.com/watch?v=qIkhZpoZw7c
