＞Level 1：睇定唔睇？
＞睇。
霸戲哥都算係狂熱電玩迷，記得當年老媽子買咗部286 VGA Mon嘅電腦畀我，我連波都唔踢，日夜狂煲「水滸傳」、「戰斧」同「泡泡龍」。唔使半年，近視度數破百。所以Netflix最近上架嘅呢套《電玩古咒》，齋睇個戲名已經衝咗入嚟。
＞Level 2：追看定放棄？
＞追看。
套戲講有位中坑沉迷八十年代電玩，畀老婆同個仔嫌棄，有日佢意外搵到隻「詛咒者」嘅遊戲，隻game會觸發現實事件。最顛係迫你二揀一，唔揀就死，且冇得棄game。第一幕個中坑已經被要迫揀犧牲阿仔條脷同隻眼，好血腥啫，啱我。
同埋以前霸戲哥玩電腦game，都要喺DOS prompt度輸入command按enter，套戲的確畀到唔少回憶我。
＞Level 3：推介定鬧爆？
＞鬧爆。
隨住劇情發展，故事主人翁原來係意外接觸到「詛咒者」嘅Keira。佢係典型廢青，自以為與別不同，但打份清潔工都做唔掂。Keira有個染上毒癮嘅阿媽，經濟長期拮据，細佬亦因為自己嘅疏忽而意外浸死。
你以為套戲係講Keira執到隻game後點樣逆轉人生同改變命運，但原來只不過係迫佢面對同正視自己嘅問題。去到電影後半段，觀眾終於知道隻game嘅秘密，居然係詛咒人哋令自己得福⋯⋯乜嘢狗血劇情嚟㗎。
＞Level 4：寫稿定算數？
＞寫稿。
既然大家都睇到嚟呢度，就知我揀咗寫埋佢。Well，大家應該中唔少Netflix嘅伏，多一次半次都冇壞啦。同套戲全長只有一個鐘多啲，用嚟消磨時間都可以接受嘅。
霸戲哥
** 博客文章文責自負,不代表本公司立場 **