博客文章
終於嚟到復活節假期嘅最後一日，相信大家嘅報復式外遊都報到有啲攰啦啩。香港嘅郊外景色固然係靚，但如果仲迫人過旺角，我寧願喺屋企攤唞吓。
咁啱Netflix最近有套新紀錄片《國家公園巡禮》（Our Great National Parks）上架，霸戲哥同豬視妹攤喺屋企，就可以睇到大自然景色同野生動物嘅奧妙，心靈都得到洗滌。節目總共五集，由前美國總統奧巴馬做聲音導航，帶我哋遊覽世界各地嘅國家公園，包括印尼、肯亞同智利，睇咗當去咗啦。
大自然係地球嘅珍貴財產，我哋有責任要愛惜佢哋，並確保下一代可以繼續享用。所以今後大家去郊遊嘅時候，請緊記唔好為咗打卡而破壞大自然。
霸戲哥
** 博客文章文責自負,不代表本公司立場 **
大陸劇《機智女法醫》播完，又輪到另一齣本土劇《食腦喪B》緊接TVB翡翠台嘅八點半時段。由「食腦三子」何廣沛、郭子豪、方紹聰，搭住江嘉敏、陳曉華同朱智賢主演，有幾「食腦」同有幾「喪」，聽晚自有分曉。
自從韓國電影《屍殺列車》上映之後，喪屍片幾乎冇停過，好似《殭屍校園》、《ALIVE》、《屍戰朝鮮》、《Happiness》，就嚟可以整個喪屍元宇宙。
至於TVB呢套《食腦喪B》，就係以喪屍片掛帥嘅小品愛情片，故事講何廣沛以為自己畀澳洲毒蜘蛛咬傷而變成喪屍，其實體內存有喪屍基因。自此，佢就時不時食人腦，食完會擁有對方嘅記憶同技能。何廣沛之後會同江嘉敏、陳曉華譜出一段搞笑又離奇嘅戀愛故事。
唔知《食腦喪B》又會唔會掀起新一輪嘅喪屍熱潮呢？
