霸戲哥之日常#133 │ 金宵手記拾壹：Momo

轉眼《金宵大廈2》已播出一半，主線劇情同金宵嘅秘密亦開始浮面。今集單元《仿客》由趙頌茹同《一秒拳王》童星熊倬樂孭飛，呢個組合又幾有睇頭噃。

預咗大家實講，阿Yu好似唔識點老，着住cosplay衫就好似更加年輕，驟眼睇真係同廿年前佢套《青出於監》個學生look冇乜分別。至於熊倬樂扮老積大家都見識過，呢次仲加咗唔少內心戲，又有料到喎。最佩服係佢人仔細細拍靈異嘢，乜夜晚瞓覺唔驚嘅咩？

咁究竟咩係「仿客」？係模仿客人嘅意思？霸戲哥覺得九成係講緊同熊倬樂有莫大關係嘅「Mimi」。「Mimi」好明顯係取材自當年紅極一時嘅「Momo Challenge」，有陌生人會透過通訊軟件發訊息畀挑戰者，不停騷擾、誘使同煽動挑戰者作出自殘，甚至自殺嘅行為。外國就曾經有報道，吹到有唔少挑戰者自殺死亡而引起世界關注。

另外，呢集亦有涉獵到區議員選舉，競選嘅陳國鋒橫睇掂睇都似斯文敗類，佢用語言偽術，成功誘使到阿Yu為佢助選。嗯，係咪同Momo Challenge嘅心靈控制術有啲類似呢？

聽晚等睇Mimi現真身。

霸戲哥

** 博客文章文責自負,不代表本公司立場 **

大陸劇《機智女法醫》播完，又輪到另一齣本土劇《食腦喪B》緊接TVB翡翠台嘅八點半時段。由「食腦三子」何廣沛、郭子豪、方紹聰，搭住江嘉敏、陳曉華同朱智賢主演，有幾「食腦」同有幾「喪」，聽晚自有分曉。

自從韓國電影《屍殺列車》上映之後，喪屍片幾乎冇停過，好似《殭屍校園》、《ALIVE》、《屍戰朝鮮》、《Happiness》，就嚟可以整個喪屍元宇宙。

至於TVB呢套《食腦喪B》，就係以喪屍片掛帥嘅小品愛情片，故事講何廣沛以為自己畀澳洲毒蜘蛛咬傷而變成喪屍，其實體內存有喪屍基因。自此，佢就時不時食人腦，食完會擁有對方嘅記憶同技能。何廣沛之後會同江嘉敏、陳曉華譜出一段搞笑又離奇嘅戀愛故事。　

唔知《食腦喪B》又會唔會掀起新一輪嘅喪屍熱潮呢？