博客文章
霸戲哥真心以為Mimi係女鬼，仲諗緊今集佢會以乜嘢型態呈現，只可惜鬼就係鬼，但只不過係阿Yu內心隻暗鬼。Mimi其實一直隱藏喺阿Yu體內，當受到傷害，肉體上或是情感上，就會出動傷／殺人。學術啲講，阿Yu應該係有人格分裂，又或者係解離症。
雖然估錯Mimi，但都估中陳國鋒屬斯文敗類。從政嘅，總有呢類投機分子，利用完人就拍拍屁股閃。不過，就算陳國鋒退選令阿Yu失望，就算被收編，都罪不致死啫，亦睇唔出阿Yu點解佢大仇口，要殺之而後快。唔通真係有「皇天擊殺」？
到單元《仿客》尾聲，阿Yu決定要同心魔了段，霸戲哥以為佢選擇面對，點知最後都係逃避，居然連人帶魔跳樓同歸於盡。面對邪惡係成年人嘅責任，唔應該由細路去承擔，但更唔應該將呢隻由懦弱衍生出嚟嘅心魔，繼續依附喺下一代。你睇，熊倬樂隻Mimi又開始強大啦。
霸戲哥認為冇人可以永遠擺脫到Mimi，極其量係降低佢嘅傷害同出現率。暫時只諗到兩個方法：一係擺脫貧窮，唔係就逆來順受。
霸戲哥
** 博客文章文責自負,不代表本公司立場 **
轉眼《金宵大廈2》已播出一半，主線劇情同金宵嘅秘密亦開始浮面。今集單元《仿客》由趙頌茹同《一秒拳王》童星熊倬樂孭飛，呢個組合又幾有睇頭噃。
預咗大家實講，阿Yu好似唔識點老，着住cosplay衫就好似更加年輕，驟眼睇真係同廿年前佢套《青出於監》個學生look冇乜分別。至於熊倬樂扮老積大家都見識過，呢次仲加咗唔少內心戲，又有料到喎。最佩服係佢人仔細細拍靈異嘢，乜夜晚瞓覺唔驚嘅咩？
咁究竟咩係「仿客」？係模仿客人嘅意思？霸戲哥覺得九成係講緊同熊倬樂有莫大關係嘅「Mimi」。「Mimi」好明顯係取材自當年紅極一時嘅「Momo Challenge」，有陌生人會透過通訊軟件發訊息畀挑戰者，不停騷擾、誘使同煽動挑戰者作出自殘，甚至自殺嘅行為。外國就曾經有報道，吹到有唔少挑戰者自殺死亡而引起世界關注。
另外，呢集亦有涉獵到區議員選舉，競選嘅陳國鋒橫睇掂睇都似斯文敗類，佢用語言偽術，成功誘使到阿Yu為佢助選。嗯，係咪同Momo Challenge嘅心靈控制術有啲類似呢？
聽晚等睇Mimi現真身。
