博客文章
史上最孤獨嘅三個職業，必定係間諜、臥底同殺手，因為佢哋發生乜嘢事都唔能夠同人分享，稍有依郁或者暴露行蹤，都會隨時冇咗條命。做得呢類人，就預咗唔會有家庭溫暖。除非……身邊有一個識得讀心術嘅人。
超人氣日本漫畫《SPY X FAMILY》就係用咗呢個setting：主角「黃昏」係一名間諜，精通易容、體術、槍法同諜報，本身係孤狼來去冇蹤。點知一次任務要佢「組織家庭」，藉此接近敵人套取情報。結果黃昏就同本身為殺手嘅「睡美人」，同埋識得超能力讀心術嘅「安妮亞」組織咗個虛構家庭。三人都有唔同agenda，各自隱暪身份，但情感又非常之真摯。
呢套動畫依家已經喺myTV SUPER同Netflix上架，暫時播咗兩集，坊間一致好評。可能大家嘅內心都有啲孤獨，好想身邊有個「安妮亞」，為你舒解困擾吧。
霸戲哥
** 博客文章文責自負,不代表本公司立場 **
轉眼《金宵大廈2》已播出一半，主線劇情同金宵嘅秘密亦開始浮面。今集單元《仿客》由趙頌茹同《一秒拳王》童星熊倬樂孭飛，呢個組合又幾有睇頭噃。
預咗大家實講，阿Yu好似唔識點老，着住cosplay衫就好似更加年輕，驟眼睇真係同廿年前佢套《青出於監》個學生look冇乜分別。至於熊倬樂扮老積大家都見識過，呢次仲加咗唔少內心戲，又有料到喎。最佩服係佢人仔細細拍靈異嘢，乜夜晚瞓覺唔驚嘅咩？
咁究竟咩係「仿客」？係模仿客人嘅意思？霸戲哥覺得九成係講緊同熊倬樂有莫大關係嘅「Mimi」。「Mimi」好明顯係取材自當年紅極一時嘅「Momo Challenge」，有陌生人會透過通訊軟件發訊息畀挑戰者，不停騷擾、誘使同煽動挑戰者作出自殘，甚至自殺嘅行為。外國就曾經有報道，吹到有唔少挑戰者自殺死亡而引起世界關注。
另外，呢集亦有涉獵到區議員選舉，競選嘅陳國鋒橫睇掂睇都似斯文敗類，佢用語言偽術，成功誘使到阿Yu為佢助選。嗯，係咪同Momo Challenge嘅心靈控制術有啲類似呢？
聽晚等睇Mimi現真身。
