霸戲哥之日常#136 │ DSE

第五波疫情打亂晒考試日期，原來DSE今個星期五就要開考。好似霸戲哥呢類臨急抱佛腳型嘅曳曳學生，的確係沉重打擊，以為可以僥倖拖到5月先開考嘛。依家得番兩日時間準備，壓力有幾大可想而知。

成日都話，人生唔只應付一場考試，一次半次挫敗或成功，都唔會為你嘅人生構成幾大影響。當然，呢番說話由我講係冇用，政府宣傳片亦唔見得有，但如果古天樂 @kootinlok_louis 講呢，就肯定另計。

古天樂早前特登拍咗條片，幫應屆DSE考生打氣，佢話我哋人人都讀緊「人生」呢科，冇標準答案，冇選擇題，條條題目都咁難答，甚至冇答案。因為人生就係學苦，諗落都幾有哲理。

霸戲哥冇考過DSE，但HKCEE其實都係差無幾。最記得當日放榜拎住張CERT四圍搵學校，仲要冇帶錢，諗起都幾徬徨。依家諗返轉頭，如果當初升番原校，分分鐘連大學都入唔到。所以，一次半次失敗真係冇乜大不了。

至於一次半次成功，更加不應在意，因為更大嘅失敗同挫折，肯定會笑住等緊你。

人生。

霸戲哥

** 博客文章文責自負,不代表本公司立場 **

霸戲哥真心以為Mimi係女鬼，仲諗緊今集佢會以乜嘢型態呈現，只可惜鬼就係鬼，但只不過係阿Yu內心隻暗鬼。Mimi其實一直隱藏喺阿Yu體內，當受到傷害，肉體上或是情感上，就會出動傷／殺人。學術啲講，阿Yu應該係有人格分裂，又或者係解離症。

雖然估錯Mimi，但都估中陳國鋒屬斯文敗類。從政嘅，總有呢類投機分子，利用完人就拍拍屁股閃。不過，就算陳國鋒退選令阿Yu失望，就算被收編，都罪不致死啫，亦睇唔出阿Yu點解佢大仇口，要殺之而後快。唔通真係有「皇天擊殺」？

到單元《仿客》尾聲，阿Yu決定要同心魔了段，霸戲哥以為佢選擇面對，點知最後都係逃避，居然連人帶魔跳樓同歸於盡。面對邪惡係成年人嘅責任，唔應該由細路去承擔，但更唔應該將呢隻由懦弱衍生出嚟嘅心魔，繼續依附喺下一代。你睇，熊倬樂隻Mimi又開始強大啦。

霸戲哥認為冇人可以永遠擺脫到Mimi，極其量係降低佢嘅傷害同出現率。暫時只諗到兩個方法：一係擺脫貧窮，唔係就逆來順受。