霸戲哥之日常#137 │ 不似預期

今朝碌手機咁啱睇到唐牛個post，當堂嚇到紮醒。話說串流媒體龍頭Netflix公佈季度財報，原本市場預期首季嘅全球付費訂戶會增加250萬，點知不升反跌，流失咗20萬訂戶，遠遜預期，仲係Netflix呢十幾年嚟第一次報告用戶流失。消息令股價肚屙，急瀉26%。

利申，霸戲哥並未持有Netflix股票，只不過驚訝堂堂一間龍頭串流媒體，都會面臨訂戶流失嘅情況，可想而知市場競爭有幾咁激烈，而我身邊都有唔少朋友裝咗Disney+。不過霸戲哥最關心嘅，都係之後Netflix有冇咁多好戲睇啫。

其實一早就有網民反映過，依家嘅Netflix已經淪為韓劇集中地，近來聽過最搞笑嘅控訴，係Christopher Nolan嘅《蝙蝠俠》三部曲，只得兩套上架。

業績不似預期，某程度上都係好事，因為Netflix如果想保住龍頭位置，就一定要諗辦法改變，最低限度都要入多啲唔同類型嘅劇種，豐富番個片庫。咁呢個永遠都係觀眾最大嘅得益。

霸戲哥

** 博客文章文責自負,不代表本公司立場 **

第五波疫情打亂晒考試日期，原來DSE今個星期五就要開考。好似霸戲哥呢類臨急抱佛腳型嘅曳曳學生，的確係沉重打擊，以為可以僥倖拖到5月先開考嘛。依家得番兩日時間準備，壓力有幾大可想而知。

成日都話，人生唔只應付一場考試，一次半次挫敗或成功，都唔會為你嘅人生構成幾大影響。當然，呢番說話由我講係冇用，政府宣傳片亦唔見得有，但如果古天樂 @kootinlok_louis 講呢，就肯定另計。

古天樂早前特登拍咗條片，幫應屆DSE考生打氣，佢話我哋人人都讀緊「人生」呢科，冇標準答案，冇選擇題，條條題目都咁難答，甚至冇答案。因為人生就係學苦，諗落都幾有哲理。

霸戲哥冇考過DSE，但HKCEE其實都係差無幾。最記得當日放榜拎住張CERT四圍搵學校，仲要冇帶錢，諗起都幾徬徨。依家諗返轉頭，如果當初升番原校，分分鐘連大學都入唔到。所以，一次半次失敗真係冇乜大不了。

至於一次半次成功，更加不應在意，因為更大嘅失敗同挫折，肯定會笑住等緊你。

人生。