霸戲哥之日常#138 │ 金宵手記拾叄：紙板人

接連幾個沉重單元，今集《OPPA》以惡搞韓星嚟緩和一下。講述超級宅女@roxannetong 湯洛雯鍾情韓星@arnoldkwokk 郭子豪，就算對方受負面新聞影響都不離不棄，仲將郭子豪嘅1:1人型紙板拎番屋企「供奉」，後來紙板居然變真人……

靚湯演超級宅女真係豁晒出去，嗰種對住OPPA嘅心心眼，隔住電視都feel到陣毒味。呢個角色好彩由靚湯演，如果唔係佢個靚樣同癡得勻循，隨時又畀人話歧視追星族（笑）。

追星無分男女，不過追星宅男畀人感覺總係差啲。霸戲哥最記得當年周秀娜推出人型攬枕，一班宅男粉絲唔怕記者嘅鏡頭，一擁而上購買心頭好，呢啲都係愛嘅表現，其實都無傷大雅啫。

人人某程度上都有戀物（Erotic Fetishism）情意結，只係程度上有深有淺，只要唔會喺生活上構成負面影響，都唔使太顧慮嘅。但若然好似N年前「活塞男」咁，借助公園鐵板嚟尋求快慰，就應該要接受心理治療嘞。

霸戲哥

** 博客文章文責自負,不代表本公司立場 **

霸戲哥真心以為Mimi係女鬼，仲諗緊今集佢會以乜嘢型態呈現，只可惜鬼就係鬼，但只不過係阿Yu內心隻暗鬼。Mimi其實一直隱藏喺阿Yu體內，當受到傷害，肉體上或是情感上，就會出動傷／殺人。學術啲講，阿Yu應該係有人格分裂，又或者係解離症。

雖然估錯Mimi，但都估中陳國鋒屬斯文敗類。從政嘅，總有呢類投機分子，利用完人就拍拍屁股閃。不過，就算陳國鋒退選令阿Yu失望，就算被收編，都罪不致死啫，亦睇唔出阿Yu點解佢大仇口，要殺之而後快。唔通真係有「皇天擊殺」？

到單元《仿客》尾聲，阿Yu決定要同心魔了段，霸戲哥以為佢選擇面對，點知最後都係逃避，居然連人帶魔跳樓同歸於盡。面對邪惡係成年人嘅責任，唔應該由細路去承擔，但更唔應該將呢隻由懦弱衍生出嚟嘅心魔，繼續依附喺下一代。你睇，熊倬樂隻Mimi又開始強大啦。

霸戲哥認為冇人可以永遠擺脫到Mimi，極其量係降低佢嘅傷害同出現率。暫時只諗到兩個方法：一係擺脫貧窮，唔係就逆來順受。